Rakipi “thumbon” socialistët: Deri tani keni punuar me inteligjencën normale të ministrave, si do ta fusni artificialen

12 Dhjetor 2023, 08:09, Aktualitet CNA

Rakipi “thumbon” socialistët: Deri tani keni punuar me

Foto nga emisioni

Sekretari i Përgjithshëm i Partisë Socialiste, Blendi Klosi, ka folur për nismën që ka prezantuar kryeministri Edi Rama në Kongres, inteligjencën artificiale, e cila sipas numrit një të qeverisë do të shpëtojë Shqipërinë nga korrupsioni dhe do të na ndihmojë të integrohemi në BE.

I ftuar në emisionin "Të Paekspozuarit", Klosi tha se kjo është bërë për të lehtësuar punët, ndërsa moderatori Ylli Rakipi ka ironizuar socialistët duke thënë se deri më tani është përdorur inteligjenca normale e ministrave të kabinetit Rama ku përmend ministrin Ulsi Manja dhe Ogerta Manastirliun, por tani do të ndërrohet me inteligjencën artificiale.

Rakipi ngre pyetjen se si do të funskionojë dhe a do të merren direktivat nga kryeministri dhe do të përpunohen nga inteligjenca.

Pyetjet thumbuese në fakt kanë shkaktuar edhe të qeshura me panelistët në studio.

Biseda në studio:

Ylli Rakipi: Folëm për inteligjencën artificiale, që do të futet këtu. Tani, inteligjenca artificiale, nuk është e pavarur apo jo? Çfarë i fut ti, ajo i përpunon. Deri tani është marrë inteligjenca normale, e ministrave që keni ju, Ulsi, Manastirliu, ministrat që keni ju, janë marrë këto dhe janë bërë punët deri tani. Po tani, si do të bëhet, do t'i thotë i madhi fare gjërat dhe do të futen në inteligjencë dhe do të përpunohen, si do bëhet kjo?

Blendi Klosi: Më falni që përgjigjen do ta jap seriozisht, se ju e doni me humor.

Ylli Rakipi: Edhe me humor po deshe, sepse e kupton populli dhe na bën punë. Pra inteligjencën normale që keni, si do ta ndërroni me artificialen? Çfarë do të fusni aty?

Blendi Klosi: Dakord pra dakord… (qesh) Në radhë të parë duhet të kuptojmë se çfarë është inteligjenca. Është grupim, database i madh informacioni, kur ti kërkon një përgjigje, e gjen aty.

Ylli Rakipi: Nuk e fut Edi Rama?

Blendi Klosi: Në database që menaxhohet nga inteligjenca artificiale, janë të futura të gjitha gjërat e shkruara në rrugë digjitale, nga BE, nga Shqipëria, nga e gjithë bota. Kur kërkon për shembull të marrësh ligjin e mjedisit, se çfarë kanë thënë shtete të tjera për mjedisin, nuk ka nevojë të marrësh të përkthesh legjislacionin e BE, por ka përmbledhje që ta sjell inteligjenca artificiale. Ajo që duhet të hedhin në database administrata është legjislacioni i vendit, që shumica janë në version digjital. Pra, është i arshivuar i gjithë legjislacioni evropian, ne hedhim shqiptarin. Inteligjenca artificiale, e merr dhe e përpunon. Nëse më parë unë pyesja me qindra njerëz në ministri, nuk kemi pasur vlerësim të plotë të gjithë legjislacionit të fushës.

Ylli Rakipi: Po për tenderët që tha Edi Rama?

Blendi Klosi: Kompanitë, të gjithë informacionin do ta hedhin në database të inteligjencës artificiale.

Ylli Rakipi: Kush e zgjedh fituesin?

Blendi Klosi: Nuk do të ketë më nevojë që ndërtuesi i rrugës x, t'i hedhë materialet sa herë të bëjë rrugën, por i ka hedhur. Kur të bëhet rruga X për shembull, punën e bën administrata, por vlerësimin e standardin është inteligjenca që nuk të lejon… Kur të vlerësohen kompanitë që mund ta bëjnë rrugën, nuk është më individi, do të jetë teknologjia.

Ylli Rakipi: Po bëri gabim inteligjenca, SPAK-u thërret inteligjencën?

Blendi Klosi: Padyshim në fund fare do të ketë një njeri që do të firmosë, një grup njerëzisht që do të firmosin. Ne po përdorim teknologjinë për të lehtësuar të gjithë këtë.

Neritan Sejamini: Këtë që po bëni ju, do e ktheni në patentë dhe t’ua shisni qeverive të tjera?

Blendi Klosi: Neritan…

Neritan Sejamini: Është shumë ide e avancuar, ke rreth 200 qeveri në botë, mund të zgjidhin korrupsionin në botë.

Blendi Klosi: Me kulturën euroatlantike që keni…

Ylli Rakipi: Këtë euroatlantike mos e përdor shumë, se a ta lë ai lart ta përdorësh…?

Blendi Klosi: Padyshim që është avantgarde, sa i përket integrimit evropian, Edi Rama e tha në Kongres që ne do të ndihmojmë edhe Kosovën.

Neritan Sejamini: Nëse kjo e inteligjencës artificiale do të bëhej tek inceneratorët, SPAK-u do të arrestonte kompjuterin dhe jo ministrat.

Blendi Klosi: Nuk dyshoj se aftësia e ju të treve për ta kthyer çdo gjë në interes të emisionit...

Andi Tela: Inteligjenca artificiale, dakord do të përgatisë 280 mijë faqet e ligjeve. Kur erdhi PS në pushtet, Rama thoshte nuk e kanë fajin njerëzit që korruptohen, por është sistemi që të korrupton. Tani kanë kaluar dhjetë vjet që ky sistemi, vijon të jetë i korruptuar, madje në mënyrë banale fare, si me inceneratorët dhe tenderët e shëndetësisë. Tek inteligjenca artificiale, prapë punonjësi do të jetë që do të ngarkojë të dhënat. Nëse ai shkruan që dhjetë kamionët e kompanisë duhet të jenë ngjyrë të kuqe, inteligjenca artificiale nuk ka çfarë t’i bëjë asaj. Ju thoni që ne kemi sukses të madh, që kemi 1200 e ca shërbime të digjitalizuara, për të cilat ne paguajmë, por në numrin e punonjësve të administratës nuk kemi asnjë lëvizje. Pra, kostot janë të njëjtat.

Blendi Klosi: Një koleg më ka thënë që ka dy korrupsione, një të vogël dhe një të madh. Për këtë të voglin, është ky e-albania. Çfarë bën kjo? Teknologjia na ka bërë të mundur që shumë gjëra të jenë "online" dhe të mos ketë korrupsion./ CNA