“Është ditë frymëzimi”/ Berisha: Pa Pavarësi të Shqipërisë nuk do të mund të kishte kurrë, Pavarësi të Kosovës

28 Nëntor 2023, 17:52, Aktualitet CNA

Ish-kryeminsitri Sali Berisha

Ish-kryeminsitri Sali Berisha ka qenë i pranishëm në eventin “Krenaria e Trashëgimisë”.

Gjatë fjalës së tij ai foli lidhur me sakrificat e bëra për shpalljen e Pavarësisë si dhe frymëzimin që ka figura e Ismail Qemalit në ditët e sotme.

“Pavarësia është ditëlindja moderne e një kombi. Është ditë frymëzimi sepse në kushtet kur Ismail Qemali dhe etërit e tjerë të Pavarësisë, shpallën në Vlorë, Pavarësinë e Shqipërisë, ai ishte një akt i guximit, vizionit të jashtëzakonshëm.”, tha Berisha.

Berisha u shpreh se pa Pavarësi të Shqipërisë nuk do të mund të kishte kurrë, Pavarësi të Kosovës.

“Ismail Qemali i vendosi fuqitë e botës, që nuk donin një shtet shqiptar, para faktit të kryer, se shteti shqiptar ekzistonte, se Shqipëria ekzistonte si shtet sovran dhe i pavarur. Në këtë kontekst po të shkojmë pas në ato kohëra dhe të mendojmë këtë akt, ky akt kalon në një legjendë të vërtetë. Por ky akt u bë vendimtar për fatin e kombit, asokohe të ndarë dhe të pushtuar pothuajse në 2/3 e trojeve të tij. Ky akt ka qenë përcaktues për Kosovën e lirë dhe të pavarur. Pa Pavarësi të Shqipërisë nuk do të mund të kishte kurrë, pavarësi të Kosovës. Pa Pavarësi të Shqipërisë, shqiptarët kudo që jetojnë në vendet e tjera në Ballkan nuk do të mund të ishin ata që janë sot.”, tha Berisha.

Sipas tij Pavarësia e Shqipërisë është si një akt mbinjerëzor i Ismail Bej Vlorës dhe elitës së kombit.

“Ndaj dhe nëse kombet e tjera e kanë Pavarësinë edhe si dhuratë, apo e kanë ndonjëherë edhe si aksident të historisë, shqiptarët e kanë nga një akt mbinjerëzor i Ismail Bej Vlorës dhe elitës së kombit. I atyre luftëtarëve, politikanëve, udhëheqësve popullor, që organizuan kryengritjet e mëdha të Kosovës. Pra sa më shumë të ndalesh në Pavarësinë tonë, ta mendosh, studiosh, lexosh, aq më mahnitëse, mrekulli, magjepsëse dhe më frymëzuese bëhet ajo.”, u shpreh lideri historic i PD-së.

Ai tha se në ditët e sotme një njeri i ka rrëmbyer vendit, kombit të gjitha pushtetet dhe punon kundër Kosovës, por sipas tij tirania i ka ditët të numëruara.

“I keni parasyshë kushtet që Isamail Bej Vlora sfidoi, të gjitha llojët, që ne sot të jemi të pavarur këtu. Tirania duhet t’i ketë ditët të numëruara. Një njeri i ka rrëmbyer vendit, kombit të gjitha pushtetet dhe punon kundër Kosovës. Prandaj e kanë quajtur Pashiçi shqiptar. “, tha Berisha./ CNA