web counter
LEXO PA REKLAMA!

SHKARKO APP

App Store
Google Play

E fundit!

x

Shkollat, të kapura nga politika/ ISP jep alarmin një ditë pas nisjes së vitit të ri shkollor

13 Shtator 2022, 09:33, Aktualitet CNA

Shkollat, të kapura nga politika/ ISP jep alarmin një ditë pas

Shkolla të depolizituara? Institucionet e pavarura dhe ndikimi politik? Fjalime politikanësh përpara mësuesve, stafit mësimor dhe nxënësve, përfshirë fëmijëve që hyjnë në klasën e parë? Legjislacioni është i qartë: ai ndalon aktivitetet politike në shkolla dhe përdorimin e shkollës për politikë. Kodet e etikës dhe legjislacioni për mbrojtjen e fëmijëve gjithashtu janë të qartë në respektimin e etikës institucionale, ruajtjen e privatësisë, lejen prindërore dhe ndalimit të përdorimit të fëmijëve për imazh politik.

Çdo vend serioz & anëtar në BE i respekton këto standarde. Po Shqipëria?

ISP monitoroi aktivitetet në shkollat e Tiranës, zonë më me presion mediatik dhe publik për vetëpërmbajtje dhe respektim të ligjit.

Rezultati? Zhgënjyes. Më 12 shtator, në ditën e parë të shkollës, përveç fjalimeve zyrtare në konferencën për arsimin (ku pati deklarime thellësisht politike dhe partiake), monitorimi i ceremonive të nisjes së mësimit nxjerr në pah ndikimin e madh politik dhe përpjekjen për t’i dhënë imazh partiak shkollave dhe mësimit.

Krahas kryebashkiakut të Tiranës, i cili edhe në ceremoni me fëmijët foli për politikë dhe sulmoi rivalët politikë, mbetet absurd dhe i papranueshëm fakti se disa nga shkollat e nisën mësimin duke pasur në program nderi fjalime të ministrave dhe deputetëve të Partisë Socialiste.

Fotot ilustrojnë se si deputetë si Eduart Shalsi apo Etilda Gjonaj, Xhemal Qefalia apo Arben Pëllumbi, ministrja Delina Ibrahimi apo Belinda Balluku, etj, mbajnë fjalime përpara nxënësve e mësuesve ose drejtojnë aktivitete, hyjnë në auditoret e mësimit dhe bëjnë rolin e “mësuesit”, një praktikë abuzive me postin, shkelje e ligjit dhe e praktikave etike në sistemin arsimor në Shqipëri. Ata janë vetëm disa, por shumë përtej kolegëve të tyre deputetë e ministra bënë të njëjtën gjë. Alibia se deputetët janë përfaqësues?

Nuk vlen. Ata nuk votohen nga këta fëmijë dhe nuk janë zgjedhur në zona, por në listë shumemërore dhe madje disa prej tyre janë caktuar nga partia në zona të ndryshme nga shkollat ku u shfaqën më 12 shtator. Ministrat?

Vetëm ministrja e Arsimit mund dhe duhet të jetë aktive në aktivitetet dhe ceremonitë shkollore, natyrisht pa dhënë opinione politike. Politika bëhet në parlament, në fushata, në publikun votues, jo në shkolla e kopshte përpara fëmijëve 7-vjeçarë apo përpara punonjësve, të cilët me ligj, konsiderohen të pavarur.

Kuraja e deputetëve për të shfaqur publikisht fotot dhe aktivitetet e tyre si aktivitete normale, është një sinjal negativ për standardet e shtetit të së drejtës, për besimin në institucionet publike, për cilësinë e pavarësinë e sistemit arsimor dhe një paralajmërim negativ edhe për fushatën e ardhshme elektorale.

ISP apelon qeverinë, ministrinë përgjegjëse dhe Kuvendin të reagojnë, duke kërkuar që vetë deputetët dhe zyrtarët e lartë të respektojnë ligjin./CNA.al





Lajmet e fundit nga