“Sektori i bujqësisë piramidë mashtrimesh”/ Berisha: Dhjetëra milionë euro përfundojnë në xhepat e qeveritarëve hajdutë

4 Dhjetor 2023, 17:43, Aktualitet CNA

“Sektori i bujqësisë piramidë mashtrimesh”/ Berisha:

Sali Berisha në takim me ekspertë për buzhetin 2024

Ish-kryeministri Sali Berisha thotë se i gjithë qëndrimi i qeverisë aktuale ndaj sektorit të bujqësisë përbën një piramidë të vërtetë mashtrimesh dhe falsifikimesh dhe në fund reduktohet në një shifër dhjetëra milionë euro, e cila në shumicë përfundon në xhepat e qeveritarëve hajdutë.

Në një takim të zhvilluar me ekspertë për buxhetin 2024 ai tha se fusha e bujqësisë është dhe fusha abuzimeve më të paimagjinueshme me paratë e taksapaguesve shqiptarë.

“Këto fusha janë dhe fushat e abuzimeve më të paimagjinueshme me paratë e taksapaguesve shqiptarë. Të lexosh buxhetin për bujqësinë dhe Shqipërinë rurale, sot ai është një përqeshje, tallje, cinizëm ndaj jetës, punës, të mbi 40% të shqiptarëve. Ky sektor i cili ka specialistë të mrekullueshëm, të përkushtuar, të aftë, që e njohin mirë atë, kanë vendosur në krye një person, e cila flet sikur vjen nga Marsi. Flet sikur nuk ka asnjë lidhje me atë sektor apo me këtë vend, shpall shifra dhe përqindje që turpërojnë çdo njeri dhe në fakt me të gjitha mbulon një mashtrim të madh, ndaj këtij sektori jashtëzakonisht të rëndësishëm. Nëse ka një sektor të cilin kjo qeveri e ka shpallur prej vitesh armik, është sektori i bujqësisë dhe Shqipëria rurale.”, tha Berisha.

Ai tha se në të gjithë statistikën e përqindjeve në tërësi nuk ndalet në vitin 2024, por flitet për vitin 2025-2026, mbasi gjithçka është falsitet.

“Në të gjithë statistikën e përqindjeve në tërësi nuk ndalet në vitin 2024, por flitet për vitin 2025-2026, mbasi gjithçka është falsitet dhe duhet të rreshtojnë përqindje, shifra se si e ti të mbulojnë injorimin e plotë të këtij sektori të një rëndësie shumë të madhe, për jetën e 40% të popullatës, por edhe për ekonominë e vendit në tërësi. I gjithë qëndrimi i qeverisë aktuale ndaj këtij sektori përbën një piramidë të vërtetë mashtrimesh dhe falsifikimesh dhe në fund reduktohet në një shifër dhjetëra milionë euro, e cila në shumicë përfundon në xhepat e qeveritarëve hajdutë.”, u shpreh Berisha. / CNA