"Sarkozy respektoi dënimin", Krasniqi: Ndryshe nga këtu, askush nuk ndërmori fushatë denigrimi ndaj gjyqtarëve e prokurorëve

12 Nëntor 2025, 12:22, Aktualitet CNA

"Sarkozy respektoi dënimin", Krasniqi: Ndryshe nga këtu,

Politologu Afrim Krasniqi, në një reagim në rrjetet sociale ka komentuar rastin e dënimit të ish-presidentit francez, Nicolas Sarkozy, dhe zbatimin e ligjit në Francë. Krasniqi shprehet se Sarkozy, ndonëse e konsideroi akuzën e ngritur ndaj tij si politike, shkoi në burg dhe respektoi vendimin e gjykatës.

Ai shton se në Francë, në gjyq apo në portën e burgut nuk pati mitingje ditore apo fjalime dhe askush nuk ndërmori fushatë denigrimi personal e familjar ndaj gjyqtarëve e prokurorëve. Krasniqi shprehet se ndryshe ndodh në Shqipëri ku udhëheqësi i vendit është vetë shteti e ligji, dhe më pas vijnë emra të tjerë dhe institucione.

Postimi i plotë:

Presidenti i Francës Nicolas Sarkozy (2007-2012), ish minister dhe ish kryetar i partisë kryesore politike goliste, u dënua me burg me akuzën për një skemë të supozuar për financimin e fushatës së tij presidenciale më 2007 me fonde nga Libia. Sipas DW, edhe pse gjykata nuk vendosi që Sarkozi i mori ose i përdori fondet për fushatën e tij, ajo e dënoi ish-presidentin për konspiracion kriminal në lidhje me skemën. Akuza pra lidhej me aktivitetin e tij politik, me fushatën, me partinë e tij politike, me përgjegjësinë publike, jo me kontot e tij personale e familjare. Ai e konsideroi akuzën politike, por respektoi vendimin, shkoi në burg dhe këto ditë siguroi lirimin duke u vendosur nën mbikëqyrje gjyqësore.

Është Francë, një vend me demokraci funksionale e ndarje të pushteteve. Në gjyq apo në portën e burgut nuk pati mitingje ditore, fjalime dhe as protesta militantësh mbështetës nga mbi 18.9 milionë votues pro tij, qindra deputetët dhe zyrtarët partiakë nuk morën pankarta të dalin në rrugë dhe askush nuk ndërmori fushatë denigrimi personal e familjar ndaj gjyqtarëve e prokurorëve. Ai e ndoqi çështjen në rrugë gjyqësore, me studio private avokatie dhe forca e tij mbështetëse politike vijoi agjendën politike paralele, pa u përfshirë në proces. Ai beson se është i pafajshëm dhe ende po vijon betejën e tij ligjore.

Ne jemi në Shqipëri, një vend që me mirësjellje quhet “demokraci hibride”, ku individi udhëheqës i radhës është “shteti/ligji” pastaj vijnë ca emra të tjerë dhe ca institucione. Ligjin?! E lexojmë dhe intepretojmë vetë "më mirë" se gjykatat dhe organet ligjzbatuese! /CNA