Rezoluta e PE / Zhupa-Ramës: Pse e lë në sirtarët e Kuvendit shfuqizimin e ligjit për zonat e mbrojtura?

17 Qershor 2026, 19:05, Aktualitet CNA

Rezoluta e PE / Zhupa-Ramës: Pse e lë në sirtarët e Kuvendit

Kryetarja e Komisionit për Kulturën, Turizmin dhe Diasporën, Ina Zhupa, ka akuzuar kryeministrin Edi Rama për qëndrime kontradiktore lidhur me rezolutën e Parlamentit Europian dhe çështjen e zonave të mbrojtura.

Zhupa deklaroi se Rama të tjera bën, të tjera thotë, duke ngritur pyetjen se përse mazhoranca vazhdon të mbajë në sirtarët e Kuvendit projektligjin e depozituar prej saj për shfuqizimin e ligjit nr. 21/2024, nëse qeveria është realisht në një linjë me qëndrimet e Parlamentit Europian.

Sipas deputetes së Partisë Demokratike, kërkesa për shfuqizimin e këtij ligji është bërë tashmë një kërkesë e qartë e protestuesve, opozitës dhe institucioneve europiane.

Ndërsa vlerësimi i ndikimit në mjedis bëhet para lejes dhe mbasi ke futur buldozeret dhe ke miratuar lejet.

“Një vendimmarrje e jashtëzakonshme e Parlamentit Europian, e cila reflekton të gjitha shqetësimet e opozitës dhe shqetësimet e protestuesve.

Në fakt ishte në përputhje të plotë me atë që miratoi edhe raporti i Komisionit të Jashtëm të Parlamentit Europian pas misionit fakt-mbledhës në Shqipëri. Ndërsa Edi Rama bëri atë që di të bëjë më mirë, “të tjera thotë e të tjera bën”. Ndërsa futi buldozerët, kamionët, rrethuan me tela një zonë të mbrojtur, sot flasin për vlerësimin e ndikimit në mjedis.

Të gjithë e dimë që vlerësimi i ndikimit në mjedis bëhet përpara se të jepet një leje, përpara se të bëhet çdo lloj ndërhyrjeje dhe përpara se projekti të shfaqet si një projekt 4 miliard dollarë, me njëmijë vende pune e me qindra fantazi të tjera që i kanë shfaqur deputetët e mazhorancës gjatë këtyre ditëve.

Një është kërkesa e panegociueshme e protestuesve, e Parlamentit Europian dhe e kujtdo shqiptari në fakt: shfuqizimi i ligjit nr. 21/2024.

Kush është qëndrimi i Edi Ramës?

Qëndrimi është ai që mban në Facebook, që e përshëndet, apo qëndrimi është ai që mban në Kuvend, që mban në sirtarët e Kuvendit që nga data 14 maj projektligjin tim për të shfuqizuar ligjin nr. 21/2024?

Është një muaj që nuk futet as në komisione e aq më pak që t’i vijë radha në seancën plenare.

Ndaj askush nuk e beson propagandën e Edi Ramës. Ndaj qytetarët do të protestojnë, sepse kërkesa e tyre themelore është jo vetëm shfuqizimi i katër ligjeve, që janë shumë të rëndësishme për t’u shfuqizuar, por edhe dorëheqja e Edi Ramës si një njeri që e ka përdorur dhe vazhdon ta përdorë Shqipërinë për interesa personale dhe të klientëve të tij”, shkruan Zhupa./ CNA