Rama, në OKB: Teknologjia bekim për vendet në zhvillim, mallkim për sulmet kibernetike

23 Shtator 2024, 20:15, Aktualitet CNA

Rama, në OKB: Teknologjia bekim për vendet në zhvillim, mallkim

Kryeministri Edi Rama

Në ditën e dytë të qëndrimit në Nju Jork, kryeministri Edi Rama u bë pjesë e tryezës së dialogut me temë “Drejt një të ardhmeje të përbashkët digjitale”.

Rama deklaroi se teknologjia digjitale është bekim për vendet në zhvillim.

Ai tha se vendi ynë po përdor avantazhet që të ofron teknologjia për të përmbushur detyrimet që lindin në procesin e anëtarësimit në BE, por edhe për të luftuar fenomene negative, siç është korrupsioni. Ai shtoi se në Shqipëri shumica dërmuese e shërbimeve publike ofrohen online.

Sipas kreut të qeverisë, teknologjia nuk është vetëm një bekim, por dhe një mallkim për njerëzimin. Si shembull konkret, ai mori sulmet kibernetike që Irani kreu ndaj Shqipërisë.

“Teknologjia digjitale me premtimin e saj për progres eksponencial është bekim për vendet në zhvillim.

Ne në Shqipëri e kemi parë në jetën reale dhe me përpjekjet përkatëse u bëmë një vend ku 95% e shërbimeve sot ofrohen online e ku sportelet dhe radhët e gjata janë tashmë histori e të shkuarës.

Nga ana tjetër, ne po shfrytëzojmë përparësitë e modelit të Inteligjencës Artificiale, për të çuar shpejt përpara negociatat për anëtarësim në Bashkimin Europian

Gjithashtu po shohim në këtë drejtim edhe për ndërtimin e një modeli të ri plotësisht transparent dhe 95% të bazuar tek IA për prokurimet publike.

Nga ana tjetër, sigurisht teknologjia digjitale nuk është vetëm një bekim, po edhe një mallkim, si psh sulmet kibernetike.

Shqipëria ka qenë viktimë e një sulmi të egër kibernetik nga Irani. Ne e provuam në realitet se sa shumë kjo botë e re e bazuar në teknologji mund të sjellë dëme për vendet dhe për qytetarët. Por tekefundit nuk ka aspak dyshim se nëse do të jemi në gjendje të krijojmë një sistem, ku bota dhe komuniteti i kombeve të përfitojnë më të mirën nga premtimet e teknologjisë digjitale dhe në të njëjtën kohë, të frenojnë të gjitha efektet e dëmshme që mund të vijnë nga përdorimi dashakeq i saj, kjo botë do të ishte një vend shumë më i mirë.

Faleminderit shumë dhe shpresoj shumë që duke folur kaq shkurt, e kam fituar simpatinë tuaj zoti Kryetar”, theksoi Rama./ CNA