E fundit!

21:26 Politikë

Balla reagon ndaj Athinës: Narta është tokë shqiptare, autoktone

Kryetari i Grupit Parlamentar të Partisë Socialiste dhe Dr...

E pësojnë keq dy drejtorët e Veliajt/ SPAK u shton akuzën për pastrim parash

23 Shtator 2024, 14:17, Aktualitet CNA

E pësojnë keq dy drejtorët e Veliajt/ SPAK u shton akuzën

Dy drejtorëve të Bashkisë së Tiranës, Mariglen Qatos dhe Redi Mollës u është shtuar dhe një akuzë tjetër nga SPAK-u.

Prokurori i çështjes, Klodian Braho, u shtoi akuzën “pastrim parash” Redi Mollës si dhe Mariglen Qatos.

Komunikimi i akuzës tjetër iu bë e njohur atyre dhe avokatëve në seancën e kësaj të hëne, e cila u zhvillua në orën 10.00.

Ndërsa për Taulant Tushën u kërkua zgjatja e afatit hetimor me tre muaj, kërkesa e cila u pranua nga gjykata.

Në 2 korrik të këtij viti, SPAK u komunikoi akuzat “korrupsion pasiv” dhe “mosdeklarim të pasurisë” Mollës dhe Qatos, ndërsa Tushes i komunikoi akuzën “shkelje e barazisë në tenderë”.

Tushe, Molla dhe Qato u arrestuan në muajin mars të këtij viti me urdhër të Prokurorisë së Posaçme Antikorrupsion, në kuadër të hetimeve për dosjen “5D”.

Tre ish-drejtorët u lanë në masën “arrest në burg”, ndërsa pesë persona të tjerë në masën “detyrim paraqitje”, konkretisht Enton Punavija, Julian Zanaj, Albano Janku, Nestor Muhamellari, Deborah Keçi dhe Englatina Zere.

Sipas SPAK-ut, Qato dhe Molla janë pronarë 'de facto' të kompanisë “5D”, e cila sipas hetimeve, ka rezultuar fituese në disa tenderë pranë bashkisë.

Bëhet fjalë për 11 procedura tenderimi në harkun kohorë të 6 viteve, nga 2016 deri në 2022.

Kompania njihet dhe me dy emra të ndryshëm “Igor Electric” dhe “Vas construction”.

Me akuzën e re Mollës dhe Qatos u zgjatet afati hetimor edhe një vit, ndërsa Tushës i përfundon pas tre muajsh./ CNA