Presione dhe skenare ndaj drejtësisë/ Sot, seanca në GJKKO për Erion Veliajn

26 Maj 2026, 10:29, Aktualitet CNA

Sot zhvillohet në GJKKO seanca për kryebashkiakun e arrestuar të Tiranës Erion Veliaj me 13 akuza për 5 vepra të rënda penale.

Erion Veliaj nuk është i pranishëm në seancën gjyqësore. Si një frikacak ai shmang gjyqet në GJKKO, pasi ka frikë të përballet me 13 akuzat për 5 veprat e rënda penale të cilat rëndojnë mbi të.

Në këtë seancë përfaqësohet nga avokati i pandehur Plarent Ndreca.

Ndërkohë paralelisht Erion Veliaj dhe avokati i tij i pandehur Plarent Ndreca po përdorin taktika të ndryshme për të mos u përballur me drejtësinë.

Kryebashkiaku i arrestuar i Tiranës, Erion Veliaj, vijon zvarritjen e gjyqeve duke përdorur çdo skemë dhe makinacion të mundshëm. Dosja e tij voluminoze ka shkuar që prej korrikut në gjykatë dhe Erion Veliaj prej 10 muajsh vijon sagën e shtyrjes së seancave.

13 akuza për 5 vepra të rënda, 9 herë korrupsion, shpërdorim detyre, pastrim të produkteve të veprës penale, fshehje pasurie, futje të sendeve të ndaluara në qeli rëndojnë mbi kryebashkiakun Erion Veliaj.

Mbi 60 mijë faqe që faktojnë me prova akuzat ndaj kryebashkiakut që ka përdorur detyrën, fondet e bashkisë, për të pasuruar veten dhe familjarët e tij. Gjatë kësaj periudhe, Veliaj ka përdorur çdo lloj makinacioni, nga ndryshimi i avokatëve te sulmet apo paditë ndaj prokurorëve dhe vendimeve të tyre në gjykata të ndryshme.

Nga biruca e burgut të Durrësit vijon të përdorë ende sulmet mediatike, duke vënë në shërbim gazetarin e familjes së tij, Mero Bazen, dhe të tjera media të paguara nga ai dhe vëllai i tij për të sulmuar e shantazhuar prokurorët dhe gjyqtarët që janë marrë me dosjen e tij.

Sulmet arrijnë deri në SHBA, me raporte të mbushura me mashtrime dhe studio ligjore lobiste që paguhen qindra mijëra dollarë për të dorëzuar këto raporte të mbushura me gënjeshtra të zbardhura njëra pas tjetrës.

Me artikuj të ndryshëm të sponsorizuar në media të huaja nga të tretë që shprehin rezerva për drejtësinë në Shqipëri. Me skenarë duke ndryshuar avokatët, për të përfunduar duke u mbrojtur nga një avokat i marrë i pandehur nga SPAK-u, si Plarent Ndreca.

Të gjitha përpëlitjet e Veliajt kundër drejtësisë tregojnë se është një frikacak, se nuk është mjaftueshëm burrë për të shkuar para drejtësisë për t'u përballur me faktet dhe provat që kanë gjetur prokurorët mbi të cilat janë ngritur 13 akuzat e rënda./ CNA