web counter
LEXO PA REKLAMA!

SHKARKO APP

App Store
Google Play

E fundit!

x

Përplasje për protestën/ Deputeti socialist: OMONIA e Dules mbron Muçin e Lëvizjes Bashkë

16 Qershor 2026, 22:24, Aktualitet CNA

Përplasje për protestën/ Deputeti socialist: OMONIA e Dules mbron

Deputeti socialist Ardit Bido në deklaratat e tij të fundit ka zbuluar se deputeti i Lëvizjes Bashkë të Arlind Qorit proteston vetëm për zonat e mbrojtura ku ai dhe familjarët e tij nuk kanë përqindje, ndryshe nga rasti i zonës në Butrint.

Bido deklaroi se familja e Muçit ka aksione në këtë zonë, prandaj edhe nuk di si të reagojë kur sheh hartën nëpër studio televizive.

Deputeti e akuzoi Muçin se del si protestues i madh për mosndërtimin në Zvërnec dhe revolucionar kundër interesave private, ndërsa e akuzon për dyfytyrësi.

Pas deklaratave të Bidos ka ardhur një reagim nga OMONIA, e cila hedh akuza ndaj deputetit socialist.

“Me shqetësim të veçantë, indinjatë dhe zemërim jemi në ndjekje të aktivizimit të rradhës të propagandës dhe akteve që lidhen me kultivimin e antihelenizmit dhe urrejtjes fetare në fushën e politikës dhe ligjërimit publik. Duke ndjekur shembullin e Kryeministrit që i ndodhur në nevojë për të gjetur edhe një herë “gishtin e armikut të huaj” në gjithë ato sa janë duke u zhvilluar në zonën e Nartës dhe Zvërnecit në Gjirin e Vlorës, pa asnjë ngurrim tregoi “Grekët”, vijimin e ka ndërmarrë deputet i Partisë së tij. Fjala është për famëkeqin Ardit Bido që konfirmon se zgjedhja e tij për formacionin e PS nga ana e Kryetarit të saj z. Edi Rama ishte pikërisht që t’i ngarkohej ky rol kultivimi të gjuhës së urrejtjes dhe acarimi në dëm të Komunitetit autokton Grek”, thuhet ndër të tjera në deklaratën e OMONIA-s.

Përplasjet kanë vijuar si dhe replikat. Deputeti socialist Ardit Bido i është kundërpërgjigjur OMONIA-s duke shkruar se po mbron Muçin e Lëvizjes Bashkë se janë bashkë në vorioepirotizëm.

“I hoqën maskat: OMONIA e Dules mbron Muçin e Lëvizjes Bashkë, se janë bashkë në vorioepirotizëm

OMONIA doli sot me një deklaratë për shtyp për të mbrojtur Redi Muçin dhe Lëvizjen Bashkë, ndërsa më sulmoi mua.

Pyetja është e thjeshtë: ç’lidhje kanë OMONIA dhe Vangjel Dule me Redi Muçin dhe Lëvizjen Bashkë?

Ç’lidhje ka një organizatë e minoritetit grek me një lëvizje marksiste dhe neokomuniste?

E thashë qartë edhe mbrëmë në emision: nuk kam asgjë kundër minoritetit grek. Përkundrazi. Sarandiotët e dinë mirë marrëdhënien time me vëllezërit minoritarë.

Sulmin e tyre e prisja, sepse prej ditësh po ua nxjerr zbuluar tezat.

Problemi është se po përpiqen t’i imponojnë kësaj proteste teza politike që nuk kanë asnjë lidhje me problemin real të banorëve dhe po fshihen pas kauzave të tjera.

Kjo është një protestë energjike dhe qytetare. Nuk duhet të devijohet nga askush për interesa dhe axhenda që nuk janë të sajat.

Fakti që sot OMONIA doli në mbrojtje të Redi Muçit dhe të tezave që kam denoncuar prej ditësh flet më qartë se çdo fakt që mund të sillja unë.

Vazhdoni bëni sikur nuk kuptoni, se këta do i nxjerrin maskat vetë dhe pastaj do shohim kush ka të drejtë. Sa keni këta në krah, e tezat e tyre në krye, më keni KUNDËR!”, shkruan Bido./ CNA





Lajmet e fundit nga