E fundit!

22:49 Aktualitet

VIDEO- “Turp, jep dorëheqjen”/ Protestuesit i zënë pritë Ramës në Berlin

Kryeministri Edi Rama është përballur me protesta nga dias...

Amnistia penale 2026 drejt miratimit në seancë plenare me tekst kontradiktor

16 Qershor 2026, 20:10, Aktualitet CNA

Amnistia penale 2026 drejt miratimit në seancë plenare me tekst

Gjatë shqyrtimit të projektligjit “Për dhënie amnistie”, në Komisionin për Çështjet Ligjore dhe Administratën Publike, në datën 15.6.2026, u evidentua një problem i lindur nga praktika e zbatimit të amnistisë së mëparshme, si pasojë e diferencës mes dhënies së vendimit dhe zbardhjes së tij, duke theksuar nevojën për një saktësim ligjor që garanton zbatim të unifikuar dhe shmang pabarazitë e krijuara nga vonesat e sistemit gjyqësor.

Personat e dënuar nuk duhet të penalizohen për vonesa procedurale që nuk varen prej tyre, siç janë vonesat në zbardhjen e vendimeve gjyqësore apo komunikimin e tyre.

Për këtë arsye, gjatë diskutimeve në komision u theksua se referenca më e përshtatshme duhet të ishte momenti i dhënies ose shpalljes së vendimit dhe jo momenti i zbardhjes së tij.

Ndryshimet në projektligjin “Për dhënie amnistie”/ Dështon përpjekja e Komisionit të Ligjeve, shkak një nen
15 Qershor, 20:34

Qëllimi i ndërhyrjes ishte i drejtë, megjithatë, formulimi i nenit 2, pika 1, shkronja “a”, krijon kontradiktë të brendshme.

Dispozita rezulton se ka këtë tekst: “1. “I dënuar” konsiderohet: a) personi i dënuar nga gjykatat e shkallës së parë të juridiksionit të përgjithshëm dhe gjykatat e shkallës së parë kundër korrupsionit dhe krimit të organizuar dhe që, brenda afatit ligjor, nuk është bërë ankim ose ankimi nuk është pranuar në gjykatat përkatëse të apelit, duke marrë formë të prerë brenda datës 31.5.2026, pavarësisht nga data e zbardhjes së vendimit gjyqësor të formës së prerë të gjykatës;

Duhet qartësuar për lexuesin se data e marrjes formë të prerë nuk është e njëjtë me datën e dhënies ose shpalljes së vendimit nga gjykatat e shkallës së parë. Forma e prerë lidhet ndër të tjera me kalimin e afatit të ankimit, mosushtrimin e ankimit ose mospranimin e tij. Për rrjedhojë, një vendim i dhënë para datës 31.5.2026 mund të marrë formë të prerë pas kësaj date për shkak të zbardhjes, njoftimit ose ecurisë procedurale të tij.

Me këtë formulim, dispozita rrezikon të prodhojë pikërisht pasojën që synon të shmangë: përjashtimin nga amnistia të personave që janë dënuar me vendim të dhënë brenda datës kufi 31.05.2026, por që nuk kanë marrë ende vendim të formës së prerë për shkaqe që nuk varen prej tyre. Për këtë arsye, togfjalëshi “pavarësisht nga data e zbardhjes” humbet efektin praktik, për sa kohë kriteri mbetet marrja formë të prerë brenda datës 31.5.2026.

Për të qënë dispozita në përputhje me qëllimin e saj, data 31.5.2026 duhet të lidhet me momentin e shpalljes së vendimit të dënimit, ndërsa marrja formë të prerë duhet të mbetet kusht për zbatimin e amnistisë, pa qenë e domosdoshme që ajo të ketë ndodhur brenda kësaj date.

Pas konsultimit me juristë të fushës penale, CNA vjen në ndihmë me këtë formulim: “1. “I dënuar” konsiderohet: a) personi ndaj të cilit gjykatat e shkallës së parë të juridiksionit të përgjithshëm ose gjykata e shkallës së parë kundër korrupsionit dhe krimit të organizuar kanë shpallur vendim dënimi deri më datën 31.5.2026, kur ky vendim ka marrë ose merr formë të prerë si pasojë e mosushtrimit të ankimit brenda afatit ligjor ose mospranimit të ankimit, pavarësisht nga data e zbardhjes ose njoftimit të vendimit.”

Ky formulim ndan qartë datën e shpalljes nga momenti procedural i marrjes formë të prerë, duke shmangur interpretime kontradiktore, trajtime të pabarabarta dhe duke ruajtur qëndrimin e synuar në Komisionin për Çështjet Ligjore dhe Administratën Publike./ CNA