LEXO PA REKLAMA!

SHKARKO APP

Përfitoi nga amnistia/ Arrestohet pas disa orësh “Buzëderri”, i dënuar për trafik droge

25 Prill 2024, 12:33, Kronika CNA

Përfitoi nga amnistia/ Arrestohet pas disa orësh

Sokol Sinomati, i njohur si “Buzëderri”, dhe i dënuar për trafik droge nga Italia, është një nga personat që ka përfituar nga Amnistia Penale.

Por vetëm pas disa orësh është arrestuar sërish nga policia.

Arrestimi është bërë për shkak se ndaj tij ka një vendim të drejtësisë italiane, që e ka dënuar me 12 vjet burg për trafik droge.

Kujtojmë se Sokol Sinomati në vitet 2000, në moshën 27-vjeçare, tronditi qytetin e Vlorës duke qëlluar me breshëri automatiku ndaj Sokol Nuhos.

I vetëshpallur si anëtar i bandës së Gazment Brrakës, ai zbriti nga makina e tij tip "Benz", dhe qëlloi në mes të ditës me breshëri automatiku ndaj Sokol Nuhos, në atë kohë 29 vjeç. Ky i fundit ishte i armatosur, dhe prandaj i është kundërpërgjigjur për vetëmbrojtje duke qëlluar me pistoletë teksa qëndronte i ulur brenda në lokal.

Mirëpo, shënjestra e tij, shpëtoi pasi asnjë plumb nuk e preku. I vrarë aksidentalisht mbeti Luigj Xhafa, 42 vjeç, i cili po lëvizte me biçikletën e tij pak metra më tutje. Ai gjeti vdekjen menjëherë, duke u goditur nga një plumb në anën e djathtë të kraharorit.

Në atë kohë dëshmitarët okularë treguan se të plagosur mbetën edhe dy kalimtarë të tjerë, një burrë dhe një grua.

Mjekët e spitalit të Vlorës deklaruan se askush nuk është paraqitur për të kërkuar ndihmë. "Buzëderri" ishte larguar në drejtim të Radhimës, ku dhe u strehua në një nga vilat e plazhit. Ai u rrethua nga forca të shumta policie dhe për plot 3 orë nuk pranoi të dorëzohej. Madje kërcënonte se do të hapte zjarr, gjë që nuk e bëri. Më pas u dorëzua.

Burime për mediat bënë me dije se ai pranoi se qëlloi në drejtim të Nuhos për shkak të një sherri të vjetër.

23 vite më vonë, djali i tij është vrarë teksa rrinte në ballkonin e banesës së tij, në katin e tretë të një pallati në lagjen “Hajro Çakërri”./ CNA

 

Lajmet e fundit nga