Nga krimi i organizuar tek aferat korruptive/ Përgjigjet e forta të Altin Dumanit

23 Maj 2024, 11:00, Aktualitet CNA

Vera 2024 pritet të jetë një verë "e nxehtë", pasi SPAK-u vijon intensivisht hetimet për aferat e mëdha korruptive dhe goditjen e krimit të organizuar.

Priten goditje të reja, si dhe kallëzime apo fletëthirrje.

Por çfarë deklaroi një ditë më parë kreu i SPAK-ut në Komisionin e Ligjeve?

Të mërkurën, kreu i SPAK-ut, Altin Dumani, raportoi në Komisionin e Ligjeve për punën e Strukturës së Posaçme gjatë vitit 2023.

I vendosur përballë deputetëve të opozitës dhe mazhorancës, disa prej të cilëve nën hetim nga SPAK-u, Dumani dha mesazhe të forta në përgjigjet e tij, që nga krimi i organizuar, aferat e mëdha korruptive dhe deri te kërcënimi i prokurorëve.

Për herë të parë, drejtuesi i një institucioni të rëndësishëm foli hapur, qartë dhe me argumente për luftën kundër krimit të organizuar dhe hetimet për aferat korruptive që deri më tani kanë çuar pas prangave edhe zyrtarë të lartë, ministra, ish-ministra dhe një zëvendëskryeministër, i cili është në arrati.

Për aferën e inceneratorëve, Dumani tha se është një nga çështjet që ende nën hetim nga SPAK-u, e ndarë në disa dosje. Ai sqaroi se afera 60 milionë euro me dherat, e denoncuar jo pak herë nga CNA, është nën hetim.

Ndërkohë, për inceneratorin e Tiranës, ai tha se paratë e paguara shkojnë në llogarinë e Agjencisë së Pasurive të Sekuestruara dhe Konfiskuara. Dumani deklaroi në Komisionin e Ligjeve se çdo para që del nga buxheti i shtetit shkon tek Agjencia e Pasurive të Sekuestruara dhe Konfiskuara.

Në lidhje me kreun e Bashkisë së Tiranës, ai tha se Erion Veliaj është nën hetim për dosjen e inceneratorëve dhe "5D". Nuk mungoi edhe një përgjigje e tij nga Veliaj për fjalën "koleg". Dumani nënvizoi se kolegë ka vetëm prokurorët e SPAK-ut dhe hetuesit e BKH-së.

Sa i përket komisionit anti-SPAK, që CNA e denoncoi pak muaj më parë, (ajo që ndryshe njihet si rezoluta antikorrupsion), Dumani u shpreh i prerë se duhet të mbrohet pavarësia institucionale dhe të respektohen pushtetet. Sipas tij, SPAK-u duhet të jetë i pavarur, një mesazh ky i qartë edhe për kryeministrin Edi Rama.

Në fushën e krimit dhe korrupsionit, ai ngriti shqetësimin nga ana e institucioneve se përveç Policisë së Shtetit, nuk ka bashkëpunim. Ai foli qartë për pastrimin e parave në fushën e ndërtimit, si një fenomen shqetësues. Sipas tij, krimi tenton të përdorë bankat dhe blerja e shtëpive është forma kryesore e pastrimit të parave.

Një tjetër deklaratë e fortë e Dumanit ishte ajo e kërcënimit të gjyqtarëve dhe prokurorëve. Sipas tij, prokurorët janë kërcënuar nga krimi i organizuar. Ai u shpreh se disa raste janë publike, ndërsa theksoi se problem është mbrojtja e familjarëve të prokurorëve dhe qytetarëve.

I pyetur nga deputeti demokrat, Dash Sula, nëse ka politikanë që kanë përdorur aplikacionin Sky ECC, kreu i SPAK-ut tha se nuk mund të prononcohet, por ka çështje në hetim.

Një shqetësim tjetër që ngriti kreu i SPAK-ut ishte edhe situata në Policinë e Shtetit. Sipas tij, është ulëritëse se si zyrtarët e policisë bashkëpunojnë me organizatat kriminale.

Për krimet zgjedhore për zgjedhjet e 2025-ës, Dumani tha se po përgatitin një strategji, e cila do të bëhet publike në janar të vitit të ardhshëm./CNA