web counter
LEXO PA REKLAMA!

SHKARKO APP

App Store
Google Play

E fundit!

x

Nesër Fitër Bajrami/ Mesazhi i Myftiut të Korçës, Ledian Cikalleshi

29 Mars 2025, 10:30, Aktualitet CNA

Nesër Fitër Bajrami/ Mesazhi i Myftiut të Korçës,

Në emër të Myftinisë së zonës Korçë dhe në emrin e tij personal, Myftiu Ledian Cikalleshi ka përcjellë një mesazh urimi për besimtarët myslimanë me rastin e festës së Fitër Bajramit. Ai e ka cilësuar këtë ditë si festën e shpërblimit, harmonisë shpirtërore, solidaritetit dhe afrimit mes njerëzve.

Në mesazhin e tij, Myftiu theksoi se muaji i bekuar i Ramazanit është përcjellë me përmallim, me shpresën e madhe që Zoti të ketë falur mëkatet dhe të ketë pranuar lutjet, adhurimet dhe sakrificat e besimtarëve. Ai nënvizoi se mirësitë dhe begatitë që Zoti u ka dhuruar njerëzve marrin kuptim vetëm kur ndahen me të tjerët, me synimin për të fituar kënaqësinë e Tij.

"Në emër të Myftinisë së Zonës Korçë dhe në emrin tim personal, ju uroj gëzuar Fitër Bajramin, ditën e shpërblimit, e harmonisë shpirtërore, solidaritetit, e vëllazërisë dhe të afrimit me njëri-tjetrin. Ne po e përcjellim me përmallim muajin e bekuar të Ramazanit, me shpresën e madhe, që Zoti të na ketë falur mëkatet tona dhe të ketë pranuar lutjet, adhurimet dhe sakrificën tonë.

Ramazani na mësoi se mirësitë dhe begatitë që na ka dhënë i plotfuqishmi marrin kuptim vetëm atëherë kur ndahen me të tjerët me synim fitimin e kënaqësisë së Zotit. Ky muaj i madhërueshëm na mësoi se sofra e iftarit është sofra e harmonisë dhe e vëllazërisë, mes besimtarëve, mes vëllezërve dhe miqve, mes të pasurve dhe të varfërve."

Duke kujtuar rëndësinë e këtij muaji, Myftiu Cikalleshi vuri theksin te sofra e iftarit si simbol i harmonisë dhe vëllazërisë mes besimtarëve, duke bashkuar njerëzit pa dallim, të pasur e të varfër, miq e familjarë. Ai u shpreh se të gjithë njerëzit janë të barabartë para Krijuesit, ndërsa dallimi mes tyre bëhet vetëm përmes devotshmërisë, përkushtimit, bujarisë dhe sinqeritetit në adhurim, lutje dhe vepra të mira.

"Të gjithë jemi të barabartë para Krijuesit, dallimi është vetëm në devotshmëri, në përkushtim, në bujari dhe te sinqeriteti në adhurim, lutje dhe vepra të mira që bëjmë. Lutjet, adhurimet, sakrifica, dhe ripërtëritja shpirtërore që përjetuam gjatë muajit të bekuar të Ramazanit na forcon dhe motivon ta shohim festen e Fitër Bajramit si ditën e shpresave të reja, si ditën e të kujtuarit dhe solidaritetit me njëri-tjetrin, si ditën e ripërtëritjes së vëllazërisë, miqësisë dhe dashurisë për njeriun dhe njerëzoren."

Duke e parë Fitër Bajramin si një ditë shprese dhe solidariteti, Myftiu i Korçës e cilësoi këtë festë si momentin e ripërtëritjes së vëllazërisë, miqësisë dhe dashurisë për njerëzimin. Ai i ftoi të gjithë besimtarët që ta shohin këtë ditë si një mundësi për të forcuar lidhjet mes tyre dhe për të ndihmuar ata që kanë nevojë. Sipas njoftimit të Myftinisë Korçë, falja e namazit të Bajramit do të zhvillohet ditën e diel, më 30 mars 2025, në orën 07:30. Në qytetin e Korçës, besimtarët do të mblidhen për falje në oborrin e xhamisë së vjetër “Iljas Bej Mirahori”, ndërsa në zonat e tjera, ceremonia do të mbahet në xhamitë përkatëse.

"Fitër Bajrami është ditën e diel, dt.30 mars 2025, ceremonia e faljes për dy xhamitë e qytetin do të zhvillohet para oborrit të xhamisë së vjetër 'Iljas Bej Mirahori', ndërsa në zonat e tjera në xhamitë përkatëse.

Janë të mirëpritur të gjithë besimtarët, burra dhe gra, fëmije e të moshuar, të marrin pjesë në ceremoninë e faljes së Bajramit, e cila fillon në orën 07:00 dhe kulmon me faljen e namazit të Bajramit në orën 07:30."

Pas faljes së namazit, besimtarët do të kenë mundësinë të marrin pjesë në ceremoninë e pritjes dhe urimeve në ambientet e Myftinisë Korçë, e cila do të zhvillohet nga ora 10:00 deri në orën 12:00. Në këtë aktivitet, besimtarët do të mund të ndajnë urimet me njëri-tjetrin dhe të takojnë përfaqësuesit fetarë në një atmosferë të ngrohtë dhe vëllazërore./ CNA





Lajmet e fundit nga