web counter
LEXO PA REKLAMA!

SHKARKO APP

App Store
Google Play

E fundit!

x

'Skema' e re e basteve sportive/ Si po operojnë bizneset në kundërshtim me ligjin

28 Mars 2025, 18:02, Aktualitet CNA

'Skema' e re e basteve sportive/ Si po operojnë bizneset në

Gazetarja Ola Xama ka zbuluar “skemën” e re përmes së cilës operon një formë e përhapur së fundmi e basteve sportive në Tiranë, pavarësisht faktit se qeveria në vitin 2018  mori vendimin për mbylljen e plotë të këtij aktiviteti.

Nëpërmjet një postimi në rrjetet sociale, Xama ka publikuar edhe fotot e disa bareve në kryeqytet, të cilat kanë brenda ekrane që ofrojnë të transmetojnë ndeshje sportive dhe nëse u kërkohet vendosja e basteve, ata e ofrojnë menjëherë.

Këto biznese kanë shtuar vendosjen e basteve në ambientet e tyre në kundërshtim me ligjin.

Kjo mund të thuhet me siguri, pasi deri më sot nuk është dhënë asnjë licencë për ushtrimin e kësaj veprimtarie, pasi AMLF sipas ligjit është e detyruar që procesin e konkurrimit ta shpallë në Buletinin e Njoftimeve Publike dhe në 2 gazeta ndërkombëtare. Në Buletinin Publik nuk ka asnjë njoftim të tillë.

Sa i përket vendimit zyrtar, ai daton në fund të vitit 2018, kur  qeveria mori vendimin për mbylljen totale të kategorisë “baste sportive” të lojrave të fatit dhe miratoi ndryshimet ligjore për lejimin e tyre në shkurt të vitit 2024.

Me ndryshimet e reja, bastet sportive do të funksionojnë vetëm online dhe licencat në këtë treg do të miratohen nga Komisioni i Licencave që përbëhet nga 7 anëtarë, 5 përfaqësues të ministrive të ndryshme dhe 2 të tjerë nga agjenci publike.

Komisioni i Licencave funksionon pranë Autoritetit të Mbikëqyrjes së Lojrave të Fatit, por që prej miratimit të ligjit, nuk ka asnjë të dhënë nga kjo agjenci nëse komisioni është ngritur, cilët janë anëtarët dhe cilat janë vendimet e marra.

Pavarësisht këtij vendimi, prej muajsh në Tiranë po shtohen me një intesitet të lartë disa bare me logon “CR7” ose “333”, ku ofrohen edhe bastet.

Pyetja që shtron edhe gazetarja është nëse e ka vrarë mendjen dikush nga Policia e Shtetit apo AMLF që në këto ambiente mund të ushtrohet veprimtari e paligjshme sepse nuk ka asnjë kompani të licensuar në këtë fushë.

Gazetarja Xama ngre pikëpyetjet se përse “investitorët” e këtyre pikave janë të bindur që do marrin licencën dhe kanë nisur investimin në lidhjen e kontratave me dhjetra lokale duke paguar kostot e logove dhe brandimit të tyre./CNA

 

 





Lajmet e fundit nga