web counter
LEXO PA REKLAMA!

SHKARKO APP

App Store
Google Play

E fundit!

x

Ndërtimi i aeroportit të Vlorës/ Balluku: Do të jemi gati në afatin e premtuar

19 Qershor 2024, 18:55, Aktualitet CNA

Ndërtimi i aeroportit të Vlorës/ Balluku: Do të jemi gati

Zëvendëskryeministrja, njëherësh Ministrja e Infrastrukturës dhe Energjisë, Belinda Balluku, e shoqëruar nga drejtori i Aviacionit Civil, Maksim Ethemaj ishin në kantierin e aeroportit ndërkombëtar të Vlorës ku ndoqën nga afër ecurinë e punimeve në këtë projekt.

Ata njoftuan se po punohet me ritme të shpejta, ku krahas ndërtimit të pistës së aeroportit, paralelisht po ndërtohet e gjithë infrastruktura aeroportuale që është pjesë e projektit.

Deri më tani janë realizuar më shumë se 40% e punimeve fizike. Drejtori Ethemaj bëri të ditur se projekti, ashtu sikundër ishte parashikuar, po zhvillohet me disa faza.

“Aeroporti në vetvete është planizuar që të zhvillohet në tre faza. Kjo është faza e parë e zhvillimit, i cili do të shoqërohet pastaj, në bazë të numrit të pasagjerëve, në fazat e tjera. Kjo që shihet shoqërohet edhe me një proces koordinimi mes palëve. Aktualisht drejtoria e Aviacionit Civil, aeroporti, Dogana dhe Policia kanë filluar punën për përcaktimin e kërkesave, vendeve ku do alokohen me qëllim llogaritjen e stafit të nevojshëm. Punimet po ecin shumë mirë”, tha Ethemaj.

Nga ana tjetër, Balluku tha se punimet fizike do të përfundojnë në fund të këtij viti, siç është parashikuar, për t’i lënë më pas kohë proceseve të certifikimit dhe kolaudimit të këtij aeroporti.

“Fazat janë të definuara, se çfarë do të ndodhë në secilën fazë, pasi një njësi kaq e madhe e aviacionit civil, ku ka disa komponentë brenda, nuk ndërtohet e gjitha që në fazën e parë. Ashtu siç është edhe e planizuar në studimin e fizibilitetit ka disa faza për të avancuar me të gjithë procesin e ndërtimit të aeroportit deri në realizimin final të të gjithë volumeve të punës që ky aeroport do të ketë. Për këtë arsye edhe ne jemi të përgatitur sipas një kalendari dhe fazave që do të hedhim një nga një, por për fazën e parë, e cila do të jetë faza e hapjes të operimeve dhe e nisjes së disa nga sektorëve, ne jemi plotësisht gati”, u shpreh Balluku.

Aeroporti do të zhvillohet në tri sektorë, aviacion civil, mirëmbajtje e avionëve, një kargo e mirëfilltë, e cila deri më tani i mungon Shqipërisë. Ministrja e Infrastrukturës dhe Energjisë e vendosi theksin tek respektimi i afateve duke sjellë në vëmendje edhe faktin se tashmë vendi ynë ka eksperiencën e duhur për finalizimin e të gjithë procesit.

“Kemi me të vërtetë në radhët tona ekspertë të mirë të fushës, të cilët e njohin tashmë procesin. Kemi bërë një test me procesin e aeroportit të Kukësit dhe ja kemi dalë në afate dhe në kohë, kështu që tashmë edhe skuadrat tona janë skuadra me eksperiencë, me kontakte shumë të mira me partnerët ndërkombëtarë dhe nga ana tjetër kanë kaluar dhe një test të fuqishëm që ka qenë ai i certifikimit të Kukësit. Kështu që tashmë le të themi kjo nuk është një provë, ky është një sukses i garantuar, mjafton që ne ti qëndrojmë afateve, ndaj insistoj tek pjesa e afateve”, nënvizoi Balluku.

Aeroporti ndërkombëtar i Vlorës do të jetë i kategorisë 4E, me një pistë me gjatësi prej 3.2 kilometrash duke mundësuar edhe fluturimet transoqeanike./ CNA





Lajmet e fundit nga