E fundit!

08:49 Kronika

Vrasja e efektivit në Maliq/ Detaje të reja, zbardhen emrat dhe rrethanat e ngjarjes

Zbardhen detaje të reja lidhur me ngjarjen e rëndë të mëng...

Instalimi i impianteve për ujërat e ndotura/ Bizneset e Pogradecit, kundër: Nuk përballojmë dot kostot

19 Qershor 2024, 14:21, Aktualitet CNA

Instalimi i impianteve për ujërat e ndotura/ Bizneset e Pogradecit,

Pak muaj më parë u miratua nga qeveria një akt normativ për menaxhimin e ujërave të zeza nga bizneset, të cilat ndodhen në zona turistike, në bregdet, liqen dhe pranë lumenjve. Akti normativ ka për qëllim zgjidhjen e problematikës së ujërave të zeza, ndërsa është vendosur se subjektet duhet të instalojnë impiante për trajtimin e ujërave në të kundërt do të përballen me gjoba të larta.

Disa përfaqësues të bizneseve në Pogradec, pasditen e djeshme, janë mbledhur për të diskutuar lidhur me këtë akt normativ duke kundërshtuar vendosjen e impianteve për përpunimin e ujërave të ndotura. Sipas tyre, qyteti i Pogradecit e ka një impiant, i cili përballon ujërat e zeza edhe të bizneseve private.

Instalimi i impianteve për ujërat e ndotura/ Bizneset e Pogradecit,

"Sot ishin ndoshta ata më të sensibilizuarit, sepse ka pasur dhe një efekt penalizimi nga strukturat shtetërore për këtë proces dhe kjo e bën më evident problemin. Sepse, problemi nuk ekziston, Pogradeci nuk e ka këtë problem, ose më mirë le të jenë instancat shtetërore që ta vërtetojnë nëse ekziston. Ne këtë kërkojmë, që Pogradeci të mos bëhet pjesë e gjithë ligjshmërisë në gjithë vendin.

Është problem i zgjidhur në këtë qytet. Disa biznese janë penalizuar, me shifra që bizneset në Pogradec nuk e përballojnë. Shkon në 1.5 milionë lekë të rinj. Ne kërkojmë mirëkuptimin nga të gjitha institucionet, do t'u dërgojmë një shkresë që të shihet specifikisht çështja e Pogradecit, sepse është problem i zgjidhur. Nëse s'do të mirëkuptohemi, do reagojmë me bojkotimin e shërbimit të klientëve, aq më tepër që presim sezonin turistik."

Përfaqësuesit e bizneseve thonë se çmimi për të instaluar këto impiante është i papërballueshëm për ta, pasi fillojnë nga 13 mijë euro deri në 100 mijë euro në varësi të kapaciteteve. Nga ana tjetër, shprehen se në aktin normativ bëhet fjalë për bizneset, ujërat e të cilëve kalojnë drejtpërdrejt në liqen, ndërsa në Pogradec derdhen në kanalizime.

Instalimi i impianteve për ujërat e ndotura/ Bizneset e Pogradecit,

"Zona jonë, Pogradeci, dhe Njësia Administrative Buçimas jemi me impiant, me kolektor të bërë dhe vazhdon kapaciteti, është marrë parasysh rritja progresive e popullsisë etj. Ne mendojmë se i ka kapacitetet edhe për 50 vjet të tjera ai impiant. Duhet të ulemi të flasim, ku është ndotja? Ne që i hedhim në rrjet, paguajmë taksa, detyrime, të gjitha. Pse duhet ta bëjmë ne?

Ne nuk jemi kundër kësaj nisme, duhej bërë me kohë siç e bëri Pogradeci me Njësinë Administrative. Pa diskutim, ai që e derdh në lumenj e liqen nuk e pranojmë dot të themi që s'duhet bërë. E kemi kundërshtuar, kemi bërë dhe dëgjesa me bashkinë. Tani jemi të detyruar të bëjmë këtë lëvizje. Luftë me shtetin nuk do bëjmë, por një reagim duhet të ketë. Si ta zgjidhim? A jemi për njëri-tjetrin? Ne paguajmë taksa, hajde t'i japim zgjidhje, por jo në këtë mënyrë."

Në këtë takim, bizneset vendosën t'i drejtohen ministrisë me një kërkesë për shfuqizimin e këtij akti normativ për zonën e Pogradecit. Po ashtu, në kërkesë kanë theksuar edhe anulimin e gjobave të cilat kanë filluar të vendosen dhe kapin vlerën deri në 10 milionë lekë. Nëse nuk do të ketë plotësim të kërkesave të tyre, bizneset do të mbyllen në shenjë proteste.

Instalimi i impianteve për ujërat e ndotura/ Bizneset e Pogradecit,

"Ka dalë një akt normativ i qeverisë, është konsideruar emergjencë kombëtare vendosja e impianteve pranë ambienteve të hoteleri turizmit për pjesën e derdhjes së ujërave të ndotura në dete, liqene, lumenj. Ky akt normativ ka cekur edhe Pogradecin, por duam të shpjegojmë që jemi në një situatë krejt ndryshe.

Në Pogradec është bërë një investim shumë i mirë i KFV-së gjermane prej 20 vitesh ku janë marrë parasysh të gjithë prurjet që do ketë si nga biznesi dhe familjarë për gjithë vitet e ardhshme. Aktualisht impianti nuk është në kapacitetin e tij të plotë, e përballon këtë fluks më së miri dhe s'ka nevojë që bizneset të cilat janë të lidhura me kolektor, kryesisht të Pogradecit dhe Njësisë Administrative Buçimas, të kenë impiante të tjera shtesë.

Së dyti, investime në pjesën e kolektorit po bëhen edhe në Lin dhe në Njësinë Administrative Udënisht dhe shumë shpejt edhe ata do shkëputen nga derdhja në liqen. Ne mendojmë që nuk duhet bërë kjo, pse duhet të paguajmë dy herë taksa, ne i paguajmë. Pushteti vendor dhe Ujësjellës Kanalizime Sh.A e taton çdo biznes këtu për heqjen e ujërave të zeza.

S'kanë pse të blejnë impiantin, të paguajnë kosto të caktuar dhe të paguash edhe ujësjellësin. S'mund të ketë taksapagim të dyfishtë për një shërbim. Patjetër që rrit kostot e biznesit, sepse si impiant ka një kosto relativisht të lartë. Variojnë nga 16 mijë euro deri në 100 mijë euro nga kapaciteti i biznesit. Një kosto e tillë dhe e menjëhershme për bizneset e Pogradecit është shumë e rëndë."

Në zonën e Pogradecit janë rreth 120 biznese operuese. Pjesa më e madhe e tyre e kanë të pamundur vendosjen e impiantit që për ta është e një kostoje mjaft të lartë, duke marrë parasysh edhe faktin se sipas tyre, situata është normale pasi ujërat e ndotura kalojnë në kanalizime e jo në ujërat e liqenit./ CNA