Vendimi i Komisionit të Apelimit/ Berisha: Dorëzuam mijëra dokumente, SIAC nuk i shqyrtoi

18 Qershor 2024, 15:15, Aktualitet CNA

Vendimi i Komisionit të Apelimit/ Berisha: Dorëzuam mijëra

Kreu i PD-së Sali Berisha, deklaratë per mediat

Kreu i PD-së, Sali Berisha, ka komentuar vendimin e Komisionit të Apelimit, duke deklaruar se nuk janë shqyrtuar mijëra dokumente të dërguara nga avokatët e tij te Sekretarja e Shtetit.

Sipas Berishës, SIAC zbulon dy elementë të rëndësishëm në vendimin e tij.

Së pari, deklaron se ai, nuk është marrë me vërtetësinë e provave dhe fakteve të paraqitura, por thjesht është marrë nëse Sekretarja e Shtetit, ka pasur prova të mjaftueshme, ka bërë analizë të drejtë të provave për vendimin që ka marrë.

Së dyti, sipas Berishës, SIAC informon se ai nuk ka marrë parasysh mijëra e mijëra faqe të dorëzuara nga Sali Berisha, sipas tij me vonesë, në Home Office, mbasi këto faqe nuk janë shqyrtuar siç kërkon ligji nga Sekretarja e Shtetit, sepse janë dorëzuar me vonesë.

Berisha ka theksuar se është një e pavërtetë që nuk i bën nder asnjë njeriu.

Më tej ai shpjegon qëllimet pse nuk janë dorëzuar dokumentet e tij, e para, që të mos mësonte të vërtetën.

Së dyti, që këto dokumente të mos mund të paraqiteshin në SIAC duke mos i shqyrtuar Sekretarja e Shtetit.

“Të dashur qytetarë dhe qytetare, jam sot para jush për të bërë disa sqarime dhe shpjegime, lidhur me vendimin e djeshëm të Komisionit të Posaçëm të Apelimit të Emigracionit të Britanisë së Madhe.

Së pari, më lejoni të rikujtoj se qëndrimi im ndaj shpalljes ‘non grata’ ka qenë i bazuar dhe mbetet i bazuar në dy parime kryesore; asnjë lobim për heqjen e këtij vendimi, padi në gjykata për shpifje dhe trillime ndaj meje.

Këto parime i zbatova plotësisht në rastin e shpalljes ‘non grata’ nga Departamenti i Shtetit, por nuk i zbatoja dot në rastin e vendimit të Home Office, sepse legjislacioni britanik nuk lejonte që unë t'u drejtohesha gjykatave pa iu drejtuar Komisionit të Posaçëm të Apelimit të Emigracionit të këtij vendi.

Ndaj dhe unë ndoqa rrugën e diktuar nga ligji.

Ankimet në këtë Komision, kërkonin që edhe Home Office të rishqyrtonte vendimin e tij. Në këtë kuadër u vendos një bashkëpunim në përputhje me marrëveshjet e arritura midis departamentit të kësaj ministrie dhe avokatëve të mi, në të cilin në mënyrë të vazhdueshme ne paraqitëm mijëra faqe, dokumente që rrëzonin të gjitha shpifjet dhe trillimet e medieve të Xhorxh Sorosit, BIRN, Balkan Insight dhe të Carlo Bollino-s, mbi të cilat ishte bazuar dhe marrja e vendimit, shpifjet e Edi Ramës, Erion Veliajt dhe Lulzim Bashës dhe hidhej dritë në të vërtetat e kësaj dosje.

Por SIAC zbulon në vendimin e tij, dy elementë shumë të rëndësishëm.

Së pari, deklaron se ai, nuk është marrë me vërtetësinë e provave dhe fakteve të paraqitura, por thjeshtë është marrë nëse Sekretarja e Shtetit, ka pasur prova të mjaftueshme, ka bërë analizë të drejtë të provave për vendimin që ka marrë.

Së dyti, SIAC na informon, se ai nuk ka marrë parasysh mijëra e mijëra faqe, të dorëzuara nga Sali Berisha, sipas tij me vonesë, në Home Office, mbasi këto faqe nuk janë shqyrtuar siç kërkon ligji nga Sekretarja e Shtetit, sepse janë dorëzuar me vonesë.

Kjo është absolutisht një e pavërtetë që nuk i bën nder asnjë njeriu.

Avokatët e mi, kanë dorëzuar në kohë, në përputhje me marrëveshjen të gjitha dokumentet e kërkuara nga Home Office, por këto dokumente nuk i janë paraqitur Sekretares së Shtetit, me dy qëllime.

Së pari, që ajo të mos mësonte të vërtetën.

Së dyti, që këto dokumente të mos mund të paraqiteshin në SIAC duke mos i shqyrtuar Sekretarja e Shtetit”, tha Berisha./ CNA