web counter
LEXO PA REKLAMA!

SHKARKO APP

App Store
Google Play

E fundit!

x

PISA, rezultate alarmante/ Vjerdha, për CNA: Arsimi në situatë kritike, pasojat afatgjata

19 Qershor 2024, 15:36, Aktualitet CNA
PISA, rezultate alarmante/ Vjerdha, për CNA: Arsimi në situatë
Kolindo Vjerdha, foto LSA

Rezultante alarmante vijnë për 15-vjeçarët shqiptarë nga testimi ndërkombëtar PISA, për sa i përket të menduarit kreativ. Vendi ynë renditet i fundit nga 64 shtete të marra në studim.

Aktivisti Kolindo Vjerdha, në një intervistë me gazetaren Fabjona Pasho, për CNA TV, analizon shkaqet e këtij rezultati.

"Tjetër raport nga PISA që tregon gjendjen kritike në të cilën ndodhet arsimi sot. Lidhet pikërisht me shkencën dhe inovacionin. Duhet të kuptojmë realitetin me të cilin ne sot jetojmë, në një botë që po shkon dhe po përqafon zhvillimet teknologjike, digjitale, inovacionin. Këtë përpiqet që të kuptojë, nëpërmjet mendimit kreativ. Ky testim, një nga rezultatet, e cila tregon realisht situatën kritike në të cilën ndodhet vendi ynë. Shqipëria ka përqindjen më të lartë të nxënësve, të cilët në më pak se 30 sekonda nuk arrijnë të titullojnë, apo nuk arrijnë të kuptojnë një figurë. Ajo çka ne sot dështojmë janë pikërisht politikat. Nga ana tjetër kemi problematika sa i përket formimit të mësuesve. Duhet të kuptojmë shumë qartë që në sistemin arsimor shqiptar kemi mësues të cilët nuk kanë lëvizur nga vendi i punës. Ata duhet të kuptojnë se duhet të ketë jo vetëm trajnime, me të cilat ministria po mundohet që të shfajësojë veten, apo të delegojë përgjegjësi në këtë situatë, duke ritrajnuar mësuesit. Një trajnim, i cili është jashtë orarit të punës, por kjo nuk zgjidhet vetëm me një trajnim, ky duhet të jetë një proces afatgjatë. Flasim për adoptim të proceseve mësimore, drejt zhvillimeve", u shpreh ai.

Sipas Vjerdhës, këto rezultate ndikojnë breza të tërë dhe do të kenë pasoja për 15 vitet e ardhshme, ndërsa thekson se mungon vullneti për të ndërmarrë politikat e duhura.

"Ajo çka në vetvete mbart ky raport, lidhet pikërisht me inovacionin, adoptimin me proceset e reja të punës dhe vendosjen në terma konkretë, sa i takon mendimit kreativ të 15-vjeçarëve. Është një raport i cili në vetvete na tregon se si do të jetë situata sa u takon studentëve, qytetarëve, në 15 vitet e ardhshme. Pra, jo vetëm tregon situatën në të cilën ndodhet arsimi. Këtu ne kuptojmë realisht se sa të efektshme janë metodat sot, por mund të jetë një projeksion shumë i mirë për të kuptuar realitetin tonë në 15 vitet e ardhshme, për ata të cilët do të jenë në tregun e punës. Nëpërmjet këtij testimi, ne arrijmë të kuptojmë në vetvete efektivitetin e politikave, si përkthehen njohuritë e nxënësit në praktikë dhe në përditshmëri. Është shumë e rëndësishme qëndrueshmëria politike. Në 10 vitet e fundit mund të themi se politikat sa i takon vlerësimit të nxënësve, sa u takon proceseve, teksteve në shkolla, kanë ndryshuar në vazhdimësi. Kjo tregon paqëndrueshmëri, por që ndikon drejtpërdrejt te cilësia, edhe tek adoptimi i mësuesve me procese të ndryshme, por mbi të gjitha te nxënësi, i cili e ka të vështirë të adoptohet në vazhdimësi. Është një proces i vazhdueshëm që nxënësit qëndrojnë brenda institucioneve arsimore ku kemi ndryshime të vazhdueshme të metodikave, të cilat ndikojnë padyshim edhe te formimi. Ne duhet të kuptojmë se tekstet, të cilat u trumbetuan shumë herë, të përkthyer nga Oxford-i, e të tjera me radhë. Ne arritëm të ndërtonim fabula sa u përket këtyre teksteve, por në të vërtetë rezultatet i masin këto tregues, të cilët janë të pakontestueshëm dhe na rendisin edhe larg vendeve të rajonit", tha ai. 

Në fjalën e tij, aktivisti shprehet se për të rinjtë sot mungojnë modelet e duhura.

"Flasim për drejtues institucionesh të arsimit të lartë në vend, që duhet të ishte gur themeli i kërkimit shkencor. Vendi në të cilin studentët duhet të ishin të prirur të shkonin dhe të mësonin drejt kësaj bote akademike. Nëse ne themi për drejtues të tillë, të cilët e justifikuan veten me një gabim të vogël të bërë, atëherë kjo do përcillet edhe në nivelet më të ulëta. Kjo do përcillet edhe si një model për studentët. Përveç drejtuesit të Universitetit të Tiranës, me plagjiaturë janë po ashtu edhe disa ministra. Pra, po flasim për një proces, i cili është i përhapur. Në momentin që procesi është i përhapur, jo vetëm kthehet në model, por bëhet një fenomen i gjithëpranuar."

Edhe më herët, rezultatet e PISA-s për Shqipërinë kanë treguar se arsimi në vend ka problematika të thella./CNA 





Lajmet e fundit nga