web counter
LEXO PA REKLAMA!

SHKARKO APP

App Store
Google Play

E fundit!

x

Ndarja nga jeta e Ismail Kadaresë/ Reagon politika: Pishtari që ndriçoi rrugën e kombit drejt Perëndimit

1 Korrik 2024, 11:00, Aktualitet CNA
Ndarja nga jeta e Ismail Kadaresë/ Reagon politika: Pishtari që
Ismail Kadare, foto Google

Kreu i Partisë së Lirisë, Ilir Meta, ka reaguar në lidhje me ndarjen nga jeta të shkrimtarit të madh, Ismail Kadare.

Në një postim në rrjetet sociale ai shprehet se kombi shqiptar humbi gjeniun e madh të letrave. Sipas tij Kadare ishte zëri universal kundër totalitarizmit, një simbol i ndritur i vokacionit tonë evropian, që me kryeveprat letrare të lëna trashëgim do t’i jemi mirënjohës përjetë. 

"Kombi shqiptar humbi sot gjeniun e madh të letrave dhe shprehësin më të jashtëzakonshëm të fuqisë së mendimit, kulturës, vlerave dhe forcës tonë krijuese, që si askush tjetër u dha atyre përmasa botërore, duke na bërë krenarë të gjithëve. Ismail Kadare ishte për shqiptarët një dritë shprese në një nga periudhat më të errëta të vendit, zëri universal kundër totalitarizmit, një simbol i ndritur i vokacionit tonë europian, që me kryeveprat letrare të lëna trashëgim do t’i jemi mirënjohës përjetë. Ngushëllimet më të sinqerta familjes së dashur Kadare, komunitetit të shkrimtarëve e publicistëve dhe mbarë kombit shqiptar për këtë humbje të madhe e të pazëvendësueshme!", shprehet Meta. 

Ndërkohë Pandeli Majko shkruan se pishtari i artit të Kadaresë ndriçoi rrugën e kombit shqiptar drejt Perëndimit!

"Ismail Kadare ka ndruar jetë! Kadare nuk ishte një shqiptar i zakonshëm! Ai ishte një shkrimtar dhe poet të cilin arti dhe gjenialiteti i tij e bëri historian dhe filozof të dorës së parë për popullin e tij dhe shqiptarinë! Pishtari i artit të Kadaresë ndriçoi rrugën e kombit shqiptar drejt Perëndimit! Për shumë arsye humbja e Kadaresë dhe mungesa e tij do të jetë përtej njerëzores! Lamtumirë mësues!", shprehet Majko. 

Ndërsa ministri i Ekonomisë dhe Kulturës e Inovacionit, Blendi Gonxhe, shkruan në rrjetet sociale se ky është një lajm i trishtë. 

"Gjeni i letrave, një figurë madhore e letërsisë shqiptare që bëri jehonë përtej kufijve e anembanë duke na përfaqësuar denjësisht! Ismail Kadare do të mbetet gjithmonë një testament i pasionit dhe talentit të pashoq, vlerë e trashëgimi e pasur kulturore që përmes rreshtave të tij do jetojë ndër breza! Ngushëllimet më të sinqerta për familjen! U prehsh në paqe, mjeshtër i madh", shprehet ai. 

Nuk ka munguar edhe një reagim nga Kreshnik Çollaku, i cili thotë se sot kombi është në zi.

"Një ndër mendjet më të ndriçuara të tij,është shuar përjetësisht. Një ditë zie mbarë kombëtare,do të ishte detyrimi minimal për këtë kollos të mendjes e të penës. Prehu në Paqe,Ismail Kadare!", u shreh Kadare. 

Ismail Kadare ndërroi jetë në moshën 88-vjeçare nga shkaqe natyrale.

Familjarët e kanë gjetur të pajetë në banesën e tij në orët e para të mëngjesit të së hënës. Ata kanë lajmëruar urgjencën e QSUT-së, por nuk mundën t'i vinin në ndihmë kolosit të letrave shqiptare./CNA 

 





Lajmet e fundit nga