web counter
LEXO PA REKLAMA!

SHKARKO APP

App Store
Google Play

E fundit!

x

Ndarja nga jeta e Fatos Nanos/ Detajet e ceremonisë së lamtumirës për ish-kryeministrin

1 Nëntor 2025, 20:27, Aktualitet CNA

Ndarja nga jeta e Fatos Nanos/ Detajet e ceremonisë së lamtumirës

Ish-kryeministri, Fatos Nano u nda nga jeta një ditë më parë në moshën 73-vjeçare. Ndërkohë ditën e nesërme do të mbahet ceremonia funebre shtetërore në ambientet e Pallatit të Kongreseve në kryeqytet.

Kryeministria ka publikuar edhe programin e ceremonisë, nga nisja e homazheve deri te përcjellja e trupit në banesën e fundit, në një ceremoni private familjare.

Programi i ceremonisë:

08:30 – Fillimi i homazheve publike;

11:00 – Përfundimi i homazheve publike

11:15 – Homazhet e personaliteteve shtetërore dhe të Trupit Diplomatik;

12:00 – Ceremonia funebre e Lamtumirës, në prani të autoriteteve të larta shtetërore dhe përfaqësuesve të Trupit Diplomatik.

Pas përfundimit të ceremonisë shtetërore, kortezhi funebër do të përcjellë trupin e të ndjerit për në banesën e fundit, në një ceremoni private familjare.

Sinjali televiziv i të gjithë ceremonisë do të mundësohet nga regjia qendrore dhe do të transmetohet drejtpërdrejt në platformat zyrtare në Facebook dhe YouTube.

Fotografët do të kenë pozicionin e tyre të dedikuara në një kënd të posaçëm të Hollit të Pallatit të Kongreseve.

Këshilli i Ministrave vendosi dje të shpallë ditën e dielë, 2 nëntor, Ditë Zie për ndarjen nga jeta të ish-kryeministrit Fatos Nano.

Ish-kryeministri nuk arriti ta mposhtë betejën e tij me sëmundjen. Prej më shumë se dy javësh, ai ishte i shtruar në spital në gjendje të rëndë shëndetësore. Fatos Nano ka qenë tri herë kryeministër i Shqipërisë dhe për 14 vjet e 1 muaj kryetar i Partisë Socialiste. /CNA





Lajmet e fundit nga