web counter
LEXO PA REKLAMA!

SHKARKO APP

App Store
Google Play

E fundit!

x

Proda shkarkon drejtuesit e policisë Korçë

1 Nëntor 2025, 18:40, Aktualitet CNA

Proda shkarkon drejtuesit e policisë Korçë

Drejtori i Përgjithshëm i Policisë së Shtetit, Ilir Proda ka vendosur shkarkimin nga detyra të drejtuesve të policisë së Korçës. Ky vendim vjen pasi një 32-vjeçar në Devoll u mor nga banesa dhe u mbajt me forcë për disa orë, duke u dhunuar fizikisht dhe kërcënuar për jetën.

Në njoftimin e mëposhtëm thuhet se pas një analize të kryer në lidhje me veprimet dhe menaxhimin e situatës, rezultoi se zinxhiri drejtues i policisë Korçë nuk ka përmbushur detyrimet ligjore dhe nuk ka menaxhuar siç duhet situatën.

Konkretisht, Proda ka shkarkuar nga detyra drejtuesin e Drejtorisë Vendore të Policisë Korçë, Erion Ahmetin. Në vendin e tij është caktuar përkohësisht Islor Islami, i cili deri sot mbante detyrën e Drejtorit të Drejtorisë Vendore për Kufirin dhe Migracionin Kukës.

Po ashtu është pezulluar nga detyra deri në përfundimin e hetimit disiplinor, zëvendësdrejtori për Hetimin e Krimit në DVP Korçë, Hajri Kushe. Policia e Shtetit njofton se ka nisur hetimin disiplinor për gjithë zinxhirin drejtues të Drejtorisë Vendore të Policisë Korçë dhe Komisariatit të Policisë Devoll, për mospërmbushje të detyrave të cilat  kanë sjellë pasoja të rënda.

Kujtojmë se lidhur me dhunimin e 32-vjeçarit, janë shoqëruar tre persona, një prej tyre vëllai i deputetit Bledion Nallbati, Alti Nallbati. Dy personat e tjerë janë shtetasit me iniciale M.B. dhe T. Ç.

Njoftimi:

Policia e Shtetit

Duke marrë shkas nga ngjarja e fundit e ndodhur në Devoll, ku një 32-vjeçar u mor me forcë nga banesa, për motive të dobëta, u mbajt për disa orë, si dhe ndaj tij u ushtrua dhunë fizike dhe u kanos për jetën, dhe pas një analize të kryer në lidhje me veprimet dhe menaxhimin e situatës, rezultoi se zinxhiri drejtues i DVP Korçë nuk ka përmbushur detyrimet ligjore dhe nuk ka menaxhuar siç duhet situatën, duke sjellë pasoja në imazhin e Policisë në komunitet.

Për sa më sipër, Drejtori i Përgjithshëm i Policisë së Shtetit, Drejtues Madhor Ilir Proda, ka vendosur:

Shkarkimin nga detyra të Drejtorit të Drejtorisë Vendore të Policisë Korçë, Drejtues Erion Ahmeti;

Pezullimin nga detyra të Zëvendësdrejtorit për Hetimin e Krimit në DVP Korçë, Drejtues Hajri Kushe, deri në përfundimin e hetimit disiplinor.

Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit, me urdhër të Drejtorit të Përgjithshëm, bazuar në nenin 121 të Ligjit për Policinë e Shtetit ka nisur hetimin disiplinor për gjithë zinxhirin drejtues të Drejtorisë Vendore të Policisë Korçë dhe Komisariatit të Policisë Devoll, për mospërmbushje të detyrave të cilat  kanë sjellë pasoja të rënda.

Po me urdhër të Drejtorit të Përgjithshëm të Policisë së Shtetit, deri në përfundim të konkursit për Drejtor Vendor, është caktuar përkohësisht në detyrën e Drejtorit të Drejtorisë Vendore të Policisë Korçë, Drejtues Islor Islami, i cili deri sot mbante detyrën e Drejtorit të Drejtorisë Vendore për Kufirin dhe Migracionin Kukës.

Policia e Shtetit siguron qytetarët se analizon me përgjegjësi çdo rast të mosveprimit profesional dhe në përputhje me ligjin nga punonjësit e saj, duke marrë masa ndëshkimore bazuar në Ligjin “Për Policinë e Shtetit” dhe në Rregulloren e Policisë. /CNA





Lajmet e fundit nga