LEXO PA REKLAMA!

SHKARKO APP

“Askush nuk është mbi ligjin, mosndëshkimit po i vjen fundi”/ Mesazhi i koduar i Kim, kujt i drejtohet ambasadorja

10 Dhjetor 2022, 13:35, Aktualitet CNA
“Askush nuk është mbi ligjin, mosndëshkimit po i vjen
Ambasadorja e SHBA në Tiranë, Yuri Kim

Teksa ka kujtuar Ditën Ndërkombëtare kundër Korrupsionit, ambasadorja e SHBA-së, Yuri Kim, ka përcjellë mesazhin e koduar.

Përmes një shkrimi, Kim ka kërkuar nga institucionet e drejtësisë, të bëhen bashkë me SHBA-në, për të ngritur antikorrupsionin si një çështje qendrore.

Kim nënvizon në shkrimin e saj se duhet treguar se të gjithë janë të barabartë para ligjit, ndërsa ka paralajmëruar se askush nuk është mbi ligjin dhe se ditëve të pandëshkueshmërisë po u vjen fundi.

"Ne kërkojmë nga institucionet e drejtësisë shqiptare të bashkohen me ne në ngritjen e antikorrupsionit si një çështje qendrore – për të bërë të qartë se të gjithë janë të barabartë para ligjit, se askush nuk është mbi ligjin, se ditëve të mosndëshkimit po u vjen fundi, se shqiptarët mund të mbështeten tek institucionet shqiptare për të dhënë drejtësi dhe se çdo person ka një shans të drejtë dhe të barabartë për sukses në Shqipëri", shkruan Kim.

Deklarata e Yuri Kim:

Shtetet e Bashkuara vazhdojnë të intensifikojnë përpjekjet tona për t’u përballur me korrupsionin dhe për t’iu kërkuar llogari aktorëve të korruptuar. Pse? Sepse ne duam ta shohim Shqipërinë mike dhe aleate e jona në NATO, të rritet më e fortë dhe më e pasur. Korrupsioni përbën një cënueshmëri të sigurisë kombëtare, kufizon dhe shtrembëron investimet, si dhe minon demokracinë”

Ndërsa shënuam dje Ditën Ndërkombëtare Kundër Korrupsionit, është e rëndësishme të ripërtërijmë përpjekjet tona për t'i dhënë fund plagës së korrupsionit. Korrupsioni ua grabit pasurinë dhe shpresën qytetarëve dhe brezave të ardhshëm. Ai ul rritjen ekonomike, pengon zhvillimin, minon demokracinë dhe hap dyert për kriminelët, trafikantët dhe terroristët.

Kjo është arsyeja pse Presidenti Biden, për herë të parë ndonjëherë, e përcaktoi antikorrupsionin si një interes thelbësor të sigurisë kombëtare dhe publikoi një strategji ambicioze të Shteteve të Bashkuara për Kundër Korrupsionit . Për të zbatuar strategjinë, Shtetet e Bashkuara punojnë në të gjithë globin për të ndihmuar vendet të parandalojnë korrupsionin, të mbështesin hetimin dhe ndjekjen penale të korrupsionit, të promovojnë transparencën dhe të fuqizojnë shoqërinë civile dhe mediat e pavarura për të zbuluar korrupsionin.

Këtë javë, qeveria e Shteteve të Bashkuara dhe Transparency International pritën Konferencën e 20 -të Ndërkombëtare Kundër Korrupsionit, e fokusuar në mbrojtjen e vlerave demokratike nga korrupsioni. Ne vlerësojmë pjesëmarrjen e zyrtarëve të qeverisë, gazetarëve dhe përfaqësuesve të OJQ-ve, përfshirë edhe nga Shqipëria.

Shtetet e Bashkuara mbështesin luftën kundër korrupsionit me veprime të qarta. Ne financojmë reformat në drejtësi, duke përfshirë BE-në dhe partnerët e tjerë. Ne mbështesim mediat investigative dhe organizatat e shoqërisë civile që luftojnë korrupsionin. Ne përdorim emërtime dhe sanksione ndaj aktorëve të korruptuar dhe do të vazhdojmë ta bëjmë këtë. Për shembull, Presidenti Biden nënshkroi një Urdhër të ri Ekzekutiv në qershor 2021, i fokusuar në vendosjen e kostove ndaj atyre që angazhohen në aktivitete që minojnë institucionet demokratike dhe destabilizojnë Ballkanin Perëndimor, përfshirë Shqipërinë. Ai Urdhër Ekzekutiv tashmë është përdorur për të sanksionuar aktorët e korruptuar.

Shtetet e Bashkuara vazhdojnë të intensifikojnë përpjekjet tona për të trajtuar korrupsionin dhe për të mbajtur përgjegjës aktorët e korruptuar. Pse? Sepse ne duam ta shohim Shqipërinë – mikun tonë dhe aleatin tonë të NATO-s – të bëhet më e fortë dhe më e pasur. Korrupsioni paraqet një cenueshmëri të sigurisë kombëtare, kufizon dhe deformon investimet dhe minon demokracinë.

Ne kërkojmë nga institucionet e drejtësisë shqiptare të bashkohen me ne në ngritjen e antikorrupsionit si një çështje qendrore – për të bërë të qartë se të gjithë janë të barabartë para ligjit, se askush nuk është mbi ligjin, se ditëve të mosndëshkimit po i vjen fundi, se Shqiptarët mund të mbështeten tek institucionet shqiptare për të dhënë drejtësi dhe se çdo person ka një shans të drejtë dhe të barabartë për sukses në Shqipëri.

Institucionet shqiptare po bëjnë progres kundër korrupsionit, por ka shumë për të bërë. Lufta kundër korrupsionit është një proces i gjatë dhe i vështirë, por suksesi është i mundur. Asnjë vend nuk është i imunizuar. Çdo vend, përfshirë Shtetet e Bashkuara, lufton korrupsionin çdo ditë. Sfida e Shqipërisë nuk është aspak unike – as e pakapërcyeshme.

Në vitin e kaluar, institucionet e drejtësisë kanë nisur ndjekjen penale të rasteve që më parë do të kishin mbetur të paprekura. Uniteti ynë si aleatë të NATO-s është ngritur në nivele të reja. Shqipëria është pjesë e Këshillit të Sigurimit të OKB-së me Shtetet e Bashkuara. Këtë verë, Shqipëria hapi negociatat e anëtarësimit me BE, një arritje e jashtëzakonshme që duhet të bëjë krenar çdo shqiptar.

Në këtë 100 - vjetor të vendosjes së marrëdhënieve diplomatike SHBA-Shqipëri, angazhimi ynë ndaj popullit të Shqipërisë është më i fortë se kurrë. Rruga përpara – drejt anëtarësimit në BE, drejt drejtësisë – mund të jetë e vështirë, por Shtetet e Bashkuara mbeten të vendosura të jenë në anën tuaj në çdo hap të rrugës, në mënyrë që të ecim përpara së bashku. Gjithmonë përpara, gjithmonë bashkë./ CNA.al

Lajmet e fundit nga