web counter
LEXO PA REKLAMA!

SHKARKO APP

App Store
Google Play

E fundit!

x

Matura Shtetërore 2026/ Kumbaro njofton ashpërsim të rregullave gjatë zhvillimit të provimeve

29 Maj 2026, 13:05, Aktualitet CNA

Ministrja e Arsimit, Mirela Kumbaro ka zhvilluar sot një konferencë për mediat lidhur me zhvillimin e provimeve të Maturës Shtetërore 2026. Kumbaro foli lidhur me detajet e organizimit të punës për mbarëvajtjen e provimeve.

“Bëhet fjalë për një punë shumë voluminoze të filluar që në muajin dhjetor të vitit 2025, kur miratuam rregulloren e maturës shtetërore. Ka qenë një proces i përditshëm për maturantët, ka filluar me publikimin online të modeleve të provimeve disa muaj më përpara, duke u dhënë mundësinë të ushtrohet. Dhe ka kulmuar me testet provë në qendrat e provimeve, ku janë simuluar provimet e maturës, fiks në të njëjtat kushte siç do të zhvillohen në datë 2, 9, 16 dhe 23 qershor, që nga organizimi logjistik, deri te masat e sigurisë, ndarja në klasa, kryerja e provimit sipas kohëzgjatjes etj.

Kemi 144 qendra provimi në gjithë vendin, janë mbi 170 monitorues direkt nga Ministria e Arsimit nëpër shkolla, është një proces që përfshin Ministrinë e Arsimit, Agjencinë Kombëtare të Arsimit Parauniversitar, Agjencinë e Sigurimit të Cilësisë në Arsimin Parauniversitar, Drejtoritë Rajonale Arsimore, Zyrat Vendore Arsimore dhe sigurisht Qendrën e Shërbimeve Arsimore", u shpreh Kumbaro. 

Ndër të tjera gjatë fjalës së saj, ministrja njoftoi ashpërsimin e rregullave dhe penalizimet me të cilat do të përballen nxënësit dhe monitoruesit të rast të thyerjes së tyre.

“Kemi vendosur një ashpërsim të rregullave dhe masave ndëshkimore. Dhe sanksionet do të jenë si për administratorët dhe për ndonjë nxënës. Çdo thyerje e rregullit gjatë procesit të provimit do të sjellë automatikisht përjashtimin e nxënësit nga provimi i maturës. Është një kosto që unë uroj të mos e marrë përsipër asnjë maturant, që të hedhë poshtë vitet e shkollimit vetëm për një gabim të tillë të pafalshëm”, u shpreh Kumbaro.  

Lidhur me publikimin e tezës para nisjes së provimit, Kumbaro tha se çdo fletë është e identifikueshme dhe do të zbulohet se kush e ka nxjerrë dhe nga ku është nxjerrë. 

"Çdo fletë është e identifikueshme kush e ka nxjerrë dhe nga ku është nxjerrë. Dhe në rastet e mëparshme, nxënësi që e ka nxjerrë është identifikuar dhe përjashtuar. Kjo kosto për një qejf për ta nxjerrë në rrjetet sociale është shumë e madhe. Do të merren të gjitha masat për ta parandaluar", tha Kumbaro. /CNA





Lajmet e fundit nga