Kreu i KLSH-së: U tregtuan akullore të kontaminuara me oksid etileni, substanca rrit rrezikun për sëmundje

16 Korrik 2024, 15:48, Aktualitet CNA

Kreu i KLSH-së: U tregtuan akullore të kontaminuara me oksid etileni,

Kreu i KLSH-së, Arben Shehu. Burimi: LSA

Kreu i KLSH-së, Arben Shehu, tha në Komisionin e Ekonomisë dhe Financave se në Shqipëri janë tregtuar akullore të kontaminuara me oksid etileni që shkaktojnë tumor, leucemi dhe ndikojnë në aftësinë riprodhuese te meshkujt.

Kj deklaratë ka shkaktuar debate gjatë mbledhjes, ku Shehu raportoi për punën e institucionit që ai drejton.

Ai u shpreh se duhet të ketë një analizë për faktorët që kanë ndikuar në rritjen e të sëmurëve me sëmundje tumorale duke përmendur dhe situatën në shëndetësi.

Në lidhje me tregtimin e akulloreve të kontaminuara, kreu i KLSH-së tha se AKU është njoftuar menjëherë dhe duhet të merrte masa për të ndaluar qarkullimin e tyre, por pretendoi se AKU nuk kreu asnjë veprim dhe nuk e bllokoi këtë produkt.

“Në 27.7.2021 u zbuluan markat e akulloreve, oksid etileni në akulloret e prodhuara në Francë, u zbulua nga Spanja që më pas ka njoftuar në sistemin ras 47 shtete, për kontaminimin e akullores me oksid otileni në disa akullore. Me pas në 30/7/2021 ka ardhur email, drejtuesit e AKU-së për këtë gjë. AKU është njoftuar menjëherë dhe duhet të merrte masa për të ndaluar qarkullimin e akulloreve të kontaminuara. Oksidi i etilenit shkakton kancer, leucemi, ndikon në aftësinë riprodhuese te meshkujt. AKU nuk kreu asnjë veprim, nuk e bllokoi këtë produkt”, theksoi Shehu.

Ndërkohë, deputetja socialiste, Blerina Gjylameti, i tërhoqi vëmendjen për mënyrën e përdorimit të fjalëve që shkaktojnë panik te qytetarët.

“Kjo është një çështje shumë sensitive. Ju dëgjova që nuk janë marrë masat nga AKU-ja. Shumë e saktë që duhet një ballafaqim. Kërkova në internet lajmin. AKU e ka tërhequr nga tregu. Dhënia e këtij informacioni nga ju ka sensivitet të lartë sikundër është shëndeti. Të thoni që nuk janë marrë masa, për mua është një pohim shumë i rëndë. Të thuash sot në 2024 që ende nuk janë tërhequr akullore. Përgjegjësia e fjalës është shumë e madhe. Besoj që do të duhet të jemi të kujdesshëm”, tha Gjylameti.

Shehu zbuloi se janë konsumuar 13.2 tonë akullore me oksid etileni, teksa produktet janë shitur kryesisht në: Tiranë, Durrës, Fier, Elbasan, Vlorë, Berat, Lushnjë, Korçë, Shkodër, Sarandë, Krujë, Burrel, Peshkopi, Tropojë dhe Lezhë./ CNA