Jo vetëm shesh me emrin e Zai Fundos/ Propozohet konferencë shkencore, dedikuar figurës poliendrike

2 Nëntor 2024, 14:39, Aktualitet CNA

Të shumtë janë figurat publike të cilat kanë vlerësuar veprën e Llazar (Zai) Fundos, pasi një shesh pranë Bashkisë së Korçës mori emrin e tij.

Pas miratimit në Këshill Bashkiak të propozimit të kryetarit të Bashkisë, Sotiraq Filo, për emërtimin e sheshit në nder të figurës së Fundos, kryetari i këshillit të qarkut Korçë, Erjon Nexhipi shprehet se ky vendim është marrë në momentin më të përshtatshëm. (Lexo këtu)

Nexhipi tha për CNA TV se vendimi përkon me 80 vjetorin e çlirimit, ku Shqipëria u pozicionua kundër fashizmit e nazizmit, ndërsa rikujton edhe momentin e çeljes së negociatave të Bashkimit Europian.

Jo vetëm shesh me emrin e Zai Fundos/ Propozohet konferencë shkencore,

Kryetari i këshillit të qarkut Korçë, Erjon Nexhipi

"Konteksti në të cilin merret ky vendim ishte momenti më i përshtatshëm. Kemi 80 vjetorin e Çlirimit që ne sot e kujtojmë si një pjesë të historisë, mund të konsiderohet si pjesa më e lavdishme e popullit shqiptar. Pozicionimi i Shqipërisë kundër fashizmit dhe nazizmit në atë moment historik, përfaqëson ato vlera të Europës që sot gjithnjë e më shumë po ndjehen. Momenti tjetër është dhe çelja e negociatave të BE", u shpreh ai.

Për Erjon Nexhipin, Llazar Fundo përfaqëson figurën e një personaliteti që la gjurmë jo vetëm në historinë shqiptare, por edhe në atë europiane, me bashkëkohësit shqiptarë në lëvizjet patriotike për zhvillimin e vendit, por edhe me ata ndërkombëtarë që shkruan histori në Europë. (Lexo këtu)

Llazar Fundo

"Për mua një personalitet si Llazar Fundo, Lazër Fundo apo Zai Fundo i njohur, përfaqëson jo thjesht një personalitet shqiptar të shekullit të kaluar, por një personalitet që la gjurmë dhe në mendimin europian të shekullit të kaluar. Bashkëkohësit e tij në lëvizjet patriotike për zhvillimin e vendit si Fan Noli, Luigj Gurakuqi, Avni Rustemi, u pasuan me bashkëpunimin në nivel ndërkombëtar me personalitete të kohës si Alterio Spinelli, Sandro Pertini, që lanë gjurmë në historinë e Europës. Një version tjetër të historisë, Llazar Fundo do të ishte simbol i asaj që do të vinte më vonë, Bashkimit Europian", deklaroi Nexhipi.

Kryetari i Këshillit të Qarkut Korçë jep lajmin e radhës ekskluzivisht për CNA TV. Nexhipi tregon se do t’i propozojë universitetit dhe institucionit që ai drejton, që vitin e ardhshëm të krijohet një konferencë shkencore që do t’i dedikohet figurës së Llazar Fundos, duke bërë bashkë personalitete të historisë shqiptare dhe europiane me analizat e tyre për të evidentuar më mirë rolin e Fundos në lëvizjen progresiste të shekullit të kaluar.

Llazar Fundo

"Unë shpresoj që vlerësime të kësaj figure të mos e lemë thjesht me këtë akt simbolik që është emërtimi i këtij sheshi. Do t’i propozoj universitetit dhe Këshillit të Qarkut që vitin që vjen të kemi një konferencë shkencore, të dedikuar për këtë figurë poliendrike, duke ftuar personalitete të historisë shqiptare dhe europiane të sjellin analizat në kërkimin e tyre për të evidentuar më mirë këtë figurë dhe rolin e tij në lëvizjen progresiste të shekullit të kaluar", theksoi ai.

Emërtimi i sheshit afër Bashkisë së Korçës është vetëm fillimi i një vlerësimi të gjerë që pritet t’i bëhet intelektualit korçar, Llazar (Zai) Fundo. Figura e këtij personaliteti me kontributin e madh që ka dhënë në historinë e vendit tonë dhe më gjerë, po promovohet në mënyrë që të njihen vlerat e tij ndër breza./ CNA