Investigimi i CNA-së për vilën "NAAN"/ Adriana Kalaja kallëzon në SPAK Ajola Xoxën

25 Nëntor 2024, 12:02, Aktualitet CNA

Investigimi i CNA-së për vilën "NAAN"/ Adriana Kalaja

Kryetarja e Komisionit të Apelimit në PD, Adriana Kalaja, ka kallëzuar në SPAK bashkëshorten e kryebashkiakut të Tiranës, Ajola Xoxa, pas investigimit të CNA-së për vilën “NAAN”, një godinë, qiraja e së cilës shkon në shumën 25 mijë euro, por i është dhënë falas nga pronarët Ajola Xoxës, që në këmbim kanë marrë tenderë nga Erion Veliaj.

“Nëpërmjet shoqërive që ka hapur e kallëzuara prej nesh Ajola Xoxa duke përfshirë dhe shoqërinë 'Ajolah' dhe 'Harabel' kemi evidentuar nisur dhe nga disa investigime të medias CNA, se si janë marrë disa objekte kundrejt ofrimit falas pa qira dhe pronarët e objekteve kanë përfituar nga Bashkia Tiranë, pra bashkëshorti i zonjës Ajola Xoxa, projekte të ndryshme, tenderë, pa garë apo leje ndërtimi në mënyrë të paligjshme”, tha Kalaja.

Ndër të tjera, Kalaja tha se një denoncim tjetër i rëndë është për prokurorin Olsi Dado, i cili nuk po bën asnjë veprim për hetimin pasuror të Veliajt dhe familjarëve të tij.

“Kemi një denoncim më të rëndë se ky. Në kallëzim sot i kemi drejtuar disa pyetje SPAK-ut. Në qershor të 2024 është pranuar që ka filluar hetimi penal në lidhje me pasurinë e shtetasve Erion Veliaj, Ajola Xoxa, nënës dhe vëllait të Veliajt.

Kujtojmë se pak ditë më parë CNA publikoi me dokumente se Ajola Xoxa administron prej vitesh një godinë ku ka vendosur “NAAN Gallery”, e cila ka sipërfaqe 269 metra katrorë dhe rreth 1100 metër truall pa asnjë qira.

CNA thelloi investigimin e saj duke kërkuar se kush ishin pronarët e vërtetë të këtij objekti, kush ishin këta njerëz apo një njeri i vetëm, që një godinë, e cila mund t’i gjeneronte të ardhura deri në 25 mijë euro në muaj, sipas të dhënave të nxjerra nga agjencitë imobilare, t’i jepte Ajola Xoxës pa qira objektin.

CNA tregoi me fakte përfitimin që kishte marrë një nga pronarët e objektit që qiranë duhet ta kishte mjaft të majme, por të majme ishin edhe të ardhurat që i vinin nga Bashkia e Tiranës, të ardhura të majme që vinin nga tenderë me flamur të kuq, të ardhura të majme, të cilat nuk ishin vetëm për Gentian Sulën që ne raportuam, por edhe për pronarë të tjerë direkt apo indirekt./ CNA