“I shtrirë në sallon, veshur me kostum dhe këmishë”/ Prokuroria zbardh detaje nga vrasja në Fier

2 Gusht 2025, 20:34, Aktualitet CNA

“I shtrirë në sallon, veshur me kostum dhe

Prokuroria e Fierit ka zbardhur detaje nga ngjarja makabre e kryer më 23 korrik, kur një e re vrau të atin.

Prokuroria, në raportin e saj për vrasjen, ka zbuluar nga hetimet se e ka gjetur viktimën të shtrirë në sallonin e banesës së tij, të veshur me kostum dhe këmishë.

Në raport përshkruhen rrethanat nga ekzpertiza, ku theksohet se nga këqyrja e jashtme e trupit të të ndjerit, u konstatua se ai kishte çarje në pjesën ballore, çarje mbi vetull, një dërmishje mbi vetullën e djathtë, si dhe dëmtime të tjera.

“Nga veprimet e para hetimore rezultoi se, në datë 23.07.2025, rreth orës 21:16 në Sallën Operative Fier, u bë një telefonatë ku kërkohej dërgimi i ambulancës, pasi një shtetas ishte dëmtuar në ambientet e tualetit të banesës së tij të ndodhur në fshatin Frashër. Ambulanca e Spitalit Rajonal Fier ka shkuar në banesën e shtetasit A.R., të cilin e ka gjetur të shtrirë në sallonin e banesës së tij, të veshur me kostum dhe këmishë.

Personeli mjekësor konstatoi se shtetasi A.R. kishte humbur jetën dhe ka njoftuar Sallën Operative se personi për të cilin kërkuan ndihmë mjekësore është i vdekur. “Në zbatim të procedurës hetimore të parashikuar në raste të tilla, në vendin e ngjarjes shkoi grupi hetimor. Nga këqyrja e jashtme e trupit të të ndjerit, u konstatua se ai kishte çarje në pjesën ballore, çarje mbi vetull, një dërmishje mbi vetullën e djathtë, si dhe dëmtime të tjera.

E bija e të ndjerit, shtetasja E.R. dhe bashkëshortja e tij, shtetasja V.R., i deklaruan grupit hetimor se e kishin gjetur të ndjerin në tualetin e banesës pa shenja jete dhe të gjakosur, kishin njoftuar fqinjët se ky shtetas ishte rrëzuar në tualet dhe në vijim ishte njoftuar ambulanca dhe policia. Ato e kanë lëvizur të ndjerin nga tualeti, e kanë pastruar dhe veshur, me qëllim kryerjen e riteve mortore, si dhe kanë pastruar vendin e ngjarjes”,-thuhet në njoftimin e Prokurorisë./CNA