33 vite nga Fronëzimi i Kryepiskopit Anastas/ Njeriu që ringriti nga gërmadhat Kishën Orthodhokse Autoqefale të Shqipërisë

2 Gusht 2025, 16:05, Aktualitet CNA

33 vite nga Fronëzimi i Kryepiskopit Anastas/ Njeriu që ringriti nga

Sot, më 2 gusht 2025, kujtohet 33-vjetori i Fronëzimit të Kryepiskopit Anastas. Kryepiskopi Anastas përkujtohet si njeriu i dërguar nga Zoti që ringriti nga gërmadhat Kishën Orthodhokse Autoqefale të Shqipërisë.

Nga dita e Fronëzimit, 2 gusht 1992, e deri në përjetësi, kujtohet Trashëgimia e një Hierarku të shenjtëruar.

Më 2 gusht të vitit 1992, në një ditë të ngrohtë vere, në Katedralen e Ungjillëzimit në Tiranë, mijëra besimtarë orthodhoksë panë me shpresë dhe lot gëzimi në sy një ngjarje historike: Fronëzimin e Fortlumturisë së Tij, Anastas Janullatos, si Kryepiskop i Kishës Orthodhokse Autoqefale të Shqipërisë.

33 vite nga Fronëzimi i Kryepiskopit Anastas/ Njeriu që ringriti nga

Pas dekadash persekutimi të tmerrshëm komunist dhe pas mohimit institucional të fesë, kjo ditë shënoi ringjalljen e Kishës Orthodhokse në Shqipëri.

Sot, më 2 gusht 2025, në heshtje, por me nderim të thellë dhe mirënjohje të përjetshme, kujtohet Fortlumturia e Tij Kryepiskopi Anastas, i cili tashmë është ndarë nga kjo botë, por ka hyrë në përjetësi me fytyrë të kthyer nga Zoti Krisht dhe nga populli që ai e deshi aq shumë.

Me jetën, përkushtimin dhe dashurinë e tij të pakushtëzuar, ai ndërtoi jo vetëm tempuj për adhurim ndaj Zotit, por edhe shpirtra të ndriçuar nga besimi, dashuria dhe paqja.

Që nga dita e Fronëzimit e deri në frymën e fundit, Fortlumturia e Tij mbeti Ati i të gjithëve, bariu që nuk e la kurrë grigjën e tij në stuhitë e tranzicionit, të varfërisë e të pasigurisë. Ai udhëhoqi me mençuri dhe durim rinovimin e plotë shpirtëror, administrativ dhe ndërtimor të Kishës, duke ndërtuar nga themelet dhjetëra kisha, manastire, shkolla dhe qendra sociale, por mbi të gjitha duke rilindur shpresën dhe besimin te Perëndia.

33 vite nga Fronëzimi i Kryepiskopit Anastas/ Njeriu që ringriti nga

Me veprën dhe misionin e tij ai u bë simbol i pajtimit dhe unitetit, jo vetëm për komunitetin orthodhoks, por për të gjithë popullin shqiptar. Në të vërtetë, figura e tij e tejkaloi kufirin fetar për t’u bërë një figurë kombëtare e respektuar dhe një zë i fuqishëm i paqes, dialogut dhe ndërgjegjes morale në Ballkan.

Kryepiskopi Anastas tregoi se besimi është veprim, dashuria është shërbesë, dhe shpresa është rrugë drejt ringjalljes. Trashëgimia e tij është e gjallë në çdo cep të Shqipërisë ku frymon një kishë, një kamp rinor, një klinikë mjekësore, një jetimore, një strehë për të varfrit, një shkollë që mban gjallë frymën e dashurisë dhe të shërbimit që ai përçoi deri në fund./CNA