Hetimet e Prokurorisë së Firences për Tonin Marinajn, KQZ për CNA: Kemi nisur verifikimet, presim përgjigje nga prokuroria

5 Shtator 2024, 09:41, Aktualitet CNA

Tonin Marinaj

8 vite më parë, në vitin 2016, kreu i Bashkisë së Malësisë së Madhe, Tonin Marinaj, është hetuar nga Prokuroria e Firences në Itali se ka themeluar, nxitur dhe drejtuar një organizatë me përmasa ndërkombëtare, me bazë kryesisht në Toskana, Venecia, Udine dhe në Shqipëri për trafik të marijuanës. (lexo këtu)

CNA ka siguruar dosjen hetimore të Prokurorisë së Firences, ku Tonin Marinaj cilësohet si "koka" e bandës kriminiale.(lexo këtu)

Në lidhje me këtë çështje, CNA iu drejtua zyrtarisht KQZ-së më 20 gusht për të marrë informacion nëse ky institucion ka nisur apo jo procedurat e verifikimit për kryebashkiakun socialist, Tonin Marinaj.

Më 2 shtator, Komisioni Qendror i Zgjedhjeve në përgjigjen zyrtare për CNA sqaron se ky institucion më 11 korrik ka vendosur kryerjen e verifikimit të thelluar për Tonin Marinajn dhe dërgimin e të dhënave përkatëse Prokurorisë së Përgjithshme për vlerësim të mëtejshëm.

KQZ nënvizon më tej se Prokuroria e Përgjithshme në lidhje me këtë subjekt nuk ka dërguar ende vendimin për miratimin e rezultateve të verifikimit.

"Në lidhje me informacionin e kërkuar për z. Tonin Marinaj, u bëjmë me dije se nga ana jonë është dërguar informacioni që disponojmë nëpërmjët shërbimit postar në daten 02.09.2024. Ju informojmë se shkresa ka përmbajtjen si më poshtë: Në përgjigje të shkresës suaj protokolluar me nr. 2487 prot., datë 20.08.2024, me lëndë 'Kërkesë për dhënie informacioni në lidhje me procedurën e verifikimit nga ana e KQZ të z. Tonin Marinaj', ju informojmë se: Komisioneri Shtetëror i Zgjedhjeve me vendimin nr. 76, datë 11.7.2024, ka vendosur kryerjen e verifikimit të thelluar të subjektit vetëdeklarues z. Tonin Zef Marinaj, kryetar bashkie, Bashkia Malësi e Madhe, i propozuar nga subjekti zgjedhor 'Partia Socialiste e Shqipërisë' dhe dërgimin e të dhënave përkatëse Prokurorisë së Përgjithshme, për vlerësim të mëtejshëm. Prokuroria e Përgjithshme në lidhje me këtë subjekt nuk ka dërguar ende vendimin për miratimin e rezultateve të verifikimit", thuhet në përgjigjen e KQZ-së.

Përgjigjja e ardhur nga KQZ-ja

Zanafilla

Gjithçka nisi pas një denoncimi të bërë nga Partia Demokratike në fillim të muajit korrik, e cila i kërkoi Prokurorisë së Përgjithshme që të verifikojë sipas ligjit të dekriminalizimit kryetarin e Bashkisë së Malësisë së Madhe, Tonin Marinaj. (lexo këtu)

Pas kërkesës së PD-së nisi lëvizjet edhe Komisioni Qendror i Zgjedhjeve, i cili më 11 korrik vendosi të nisë verifikimin e thelluar për kryebashkiakun socialist.

Në lidhje me këtë kërkesë nuk ka munguar edhe reagimi i vetë Marinajt, i cili ka theksuar se gjithçka është një skenar i turpshëm dhe akuzat janë të fabrikuara dhe politike. (lexo këtu)

Theksojmë se edhe pas këtyre hetimeve, Tonin Marinaj ka mashtruar edhe dy herë në formularët e vetëdeklarimit për zgjedhjet vendore të 2019 dhe ato të 2021-shit.

Në të dy formularët e vetëdeklarimit, Tonin Marinaj ka thënë se nuk ka qenë asnjëherë nën hetim apo gjykim nga një autoritet i huaj për ndonjë vepër penale. (lexo këtu)

CNA është përpjekur të komunikojë disa herë me kryebashiakun socialist, Tonin Marinaj, në lidhje me këtë çështje, por ai nuk u është përgjigjur telefonatave tona./CNA