E fundit!

15:42 Aktualitet

Protestuesit para selive/ Balla: Kush qëndron pas tyre e ka gabim, mund të çojnë në vëlla-përplasje

Kreu i grupit të Partisë Socialiste Taulant Balla ka kriti...

Hetimet/ Tonin Marinaj u fotografua në Firence, akuzohet se zhvilloi takime për pazaret e drogës

26 Gusht 2024, 11:00, Aktualitet CNA

Hetimet/ Tonin Marinaj u fotografua në Firence, akuzohet se zhvilloi takime

Tonin Marinaj, kreu i Bashkisë së Malësisë së Madhe

Detaje të reja kanë dalë nga dosja hetimore e prokurorisë së Firences e siguruar nga CNA për kryebashkiakun e Malësisë së Madhe, Tonin Marinaj.

Ky i fundit është akuzuar nga Prokuroria e Firences se ka themeluar dhe drejtuar një organizatë me përmasa ndërkombëtare, me bazë kryesisht në Toskana, Venecia, Udine dhe në Shqipëri për trafik të marijuanës.

Prokuroria e Firences ka përfunduar hetimet në pranverën e vitit 2016, dhe në dosjen qindra faqesh që ka referuar në gjykatë, Marinaj akuzohet se ka drejtuar një grup që trafikonte drogë nga Shqipëria drejt Italisë. (lexo këtu)

Nga hetimet e prokurorisë ka rezultuar se kryebashkiaku socialist ndiqte gjithë itinerarin e drogës, nga prodhimi deri te shitja me pakicë. Lënda narkotike sigurohej në Shqipëri, e cila pasi mbërrinte në Itali u dorëzohej korrierëve, të cilët nisnin shpërndarjen në terren. (lexo këtu)

Prokuroria e Firences ka mundur të sigurojë foto, takime, si dhe biseda telefonike të kryebashkiakut të Malësisë së Madhe, i cili akuzohet se ka komunikuar me anëtarët e bandës kriminale për trafik të lëndës narkotike. Madje theksohet në dosje se ai është fotografuar gjatë takimeve dhe përgjuar në bisedat telefonike.

Hetimet

Sipas prokurorisë italiane, më 17 korrik të vitit 2010, Marinaj shkoi në Firence për të kërkuar mbështetje logjistike nga Lodovick Gjokaj, menaxher i një lokali në tregun "San Lorenzo". Autoritetet e akuzojnë Marinajn se shkoi në Firence edhe për shkak të menaxhimit të një ngarkese marijuane si dhe për të grumbulluar paratë nga shitja e disa sasive drogë.

"Siç përshkruhet më mirë në dosjen e tij personale, Tonin Marinaj, pak ditë pas telefonatës së lartpërmendur, pikërisht më 17 korrik 2010, shkoi në Firence, duke kërkuar mbështetje logjistike nga Lodovick Gjokaj, menaxher i një lokali në tregun San Lorenzo, zona e quajtur 'Kapela Medici'. Mbërritja e Marinajt në Firence u bë për shkak të menaxhimit të drejtpërdrejtë të ngarkesës së marijuanës të depozituar në zonën e 'Via Fratelli Benini' në numrin 8 dhe për të menaxhuar grumbullimin e parave. Atë ditë Tonini së bashku me një nga bashkëpunëtorët e tij, ndoshta kushëririn e gruas së tij Linditës, shkuan në lokalin e Lodovick Gjokajt, ku kaluan kohë me vëllain e këtij të fundit, Eduard Gjokajn, dhe më pas shkuan së bashku me këtë të fundit dhe shoqëruesin e tij në Piazza Salvemini, ku kanë kryer dy biseda telefonike. Në foto: Burri me këmishë me vija është Eduard Gjokaj, burri me këmishë blu është Tonin Marinaj, burri me këmishë në ngjyrën e bimës së jargavanit është shoqëruesi i Tonin Marinajt", thuhet në dosjen hetimore të prokurorisë italiane, e cila është mbi 200 faqe.

Hetimet e prokurorisë italiane

Në dosjen hetimore nënvizohet gjithashtu se më 17 korrik 2010, një person shkoi në Firence për të marrë Tonin Marinajn në dalje të autostradës "Firenze Nord". Sipas organit të akuzës, këto detaje kanë dalë nga përgjimet e numrit të telefonit të Eduard Gjokës.

"Pasi ka marrë Tonin Marinajn, e ka shoqëruar drejt zonës së Lombardisë ku do të pritej nga personi i njohur nga hetimi si Artur, i cili ishte paguar nga Tonin Marinaj për t'i dhënë udhëzime Fredinand Pajës në lidhje me dorëzimin e parave në lidhje me një grup të mëparshëm droge, dërgesë e cila pritej të realizohej më 19 korrik 2010 në territorin fiorentin", thuhet ndër të tjera në dosjen hetimore.

Hetimet e prokurorisë italiane

Theksojmë se CNA do të vijojë të publikojë të gjitha dokumentet e autoriteteve që disponon në lidhje me këto hetime. Deri në momentin e publikimit të dosjes hetimore të autoriteteve italiane, CNA ka tentuar disa herë të komunikojë me kryebashkiakun socialist, Tonin Marinaj, në lidhje me këtë çështje, por ai nuk u është përgjigjur telefonatave tona. Në postimet në rrjetet sociale ai ka hedhur poshtë të gjitha akuzat. (lexo këtu)

Gjithçka nisi pas një denoncimi të bërë nga Partia Demokratike, e cila i kërkoi Prokurorisë së Përgjithshme që të verifikojë sipas ligjit të dekriminalizimit kryetarin e Bashkisë së Malësisë së Madhe, Tonin Marinaj.(lexo këtu)

Pas kërkesës së PD-së nisi lëvizjet edhe Komisioni Qendror i Zgjedhjeve, i cili më 11 korrik vendosi të nisë verifikimin e thelluar për kryebashkiakun socialist. Në lidhje me këtë çështje CNA i është drejtuar zyrtarisht KQZ-së se si po vijohet me këto verifikime dhe se a ka pasur dijeni për hetimet ndaj kryebashkiakut. Ende nuk kemi marrë një përgjigje zyrtare.

Pas këtyre hetimeve, Tonin Marinaj ka deklaruar në formularin e vetëdeklarimit të bërë më 24 mars 2023, se nuk ka qenë asnjëherë i dënuar me vendim gjyqësor të formës së prerë nga ndonjë autoritet gjyqësor shqiptar apo i huaj.(lexo këtu)

Po kështu, kryebashkiaku socialist ka mohuar se ka qenë nën hetim apo gjykim nga një autoritet i huaj për ndonjë vepër penale./CNA