Hetimet e Prokurorisë së Fierit/ ‘Bankers Petroleum’ ka faturuar 100% shërbim “stand by”

3 Gusht 2025, 18:32, Aktualitet CNA

Hetimet e Prokurorisë së Fierit/ ‘Bankers Petroleum’ ka

Prokuroria e Fierit listoi një sërë shkeljesh të rënda për kompaninë koncesionare ‘Bankers Petroleum’.

Dosja hetimore e çështjes thekson se nga verifikimi analitik i blerjeve rezulton se faturat e blerjes nuk paraqesin të dhëna identifikuese të mjaftueshme për mallrat e blerë, apo elementët që duhet të plotësohen si në faturë apo edhe në dokumenta shoqërues, mbi bazën e të cilave të vërtetohet saktësia e deklarimeve të shoqërisë.

Gjithashtu, për periudhën 2004-2024, ‘Bankers Petroleum’ ka faturuar 100% shërbim “Stand by”, pra duke mos kryer asnjë shërbim në funksion të aktivitetit.

Në njoftimin e mëhershëm nga Prokuroria Fier, theksohej se për një periudhë 10-vjeçare, kompania koncensionare deklaronte se ka dalë me humbje, pavarësisht se vijonte tregtimin në sasi të konsiderueshme të naftës dhe karburantit.

Nga hetimet rezultonte se ‘Bankers Petroleum’ kishte kryer verpime fiskale fiktive dhe i ka shkaktuar buxhetit të shtetit një dëm prej miliona eurosh.

“Nga hetimi i deritanishëm ka rezultuar se, shoqëria “Bankers Petroleum Albania Ltd”, nga viti 2004 e deri në fund të vitit 2024 ka dalë me humbje, çka ka bërë që shteti shqiptar të mos përfitojë asnjë të ardhur prej 20 vitesh nga ky aktivitet, pavarësisht se janë nxjerrë e tregtuar sasi të konsiderueshme karburanti në zonat e njohura me rezerva nafte, Patos-Marinëz-Fier. Është vërejtur se, shoqëria ka kryer eksporte dhe shitje brenda vendit nga viti 2004 deri në vitin 2024 në vlerën prej 532,433,614,112 lekë. Po ashtu, rezulton se shoqëria ka deklaruar shpenzime tatimore në vlera që tejkalojnë të ardhurat nga eksportet dhe shitjet, duke dalë në çdo vit ushtrimor me humbje, ku vlera totale për të gjitha periudhat është në shumën 11,691,799,688 lekë. Nga hetimi, dyshohet se dëmi i shkaktuar në buxhetin e shtetit, përmes përfitimit të Tvsh-së, është në miliona euro”,-thuhet në njoftimin e Prokurorisë./CNA