E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Gent Ibrahimi: Në emër të kushtetutës po zhvillohen beteja të mirëfillta politike

27 Nëntor 2023, 12:40, Aktualitet CNA

Gent Ibrahimi: Në emër të kushtetutës po zhvillohen beteja

Gent Ibrahimi anëtar i Gjykatës Kushtetuese

Anëtari i Gjykatës Kushtetuese, Gent Ibrahimi, në fjalën e mbajtur sot në sallën e Kuvendit tha se në emër të Kushtetutës po zhvillohen beteja të mirëfillta politike, ndërsa ende në jetën politike janë aktivë disa prej atyre që kanë miratuar këtë dokument themelor të shtetit.

“Pjesa më e madhe e atyre që ishin protagonistë në procesin e miratimit të kushtetutës janë ende pjesë aktive e jetës politiko-shoqërore shumë syresh janë me ne sot këtu, por duhet thënë jo të gjithë patën kontributin në miratim e kushtetutës dhe të gjithë pritet ta respektojnë pa asnjë ekuivok atë, por ku qëndron vështirësia? Nuk mund të neglizhohet fakti se procesi i miratimit të kushtetutave është një ushtrim politik. Politika në demokraci nuk është kurrë monolit. Nevoja objektive për të përfaqësuar shtresa dhe interesa të ndryshme shoqërore kombinuar me nevojën për të fituar epërsi politike në zgjedhje bën që krahët e ndryshëm të politikës të vendosen në pozita antagoniste mes tyre duke vështirësuar në këtë mënyrë miratimin e Kushtetutës dhe shpesh çështjet objekt diskutimi shndërrohen në çështje betejash të mirëfillta politike duke vendosur protagonistët në pozita konkurruese me njëri-tjetrin. Rezultati, jo të gjithë identifikohen me të njëjtën cilësi me Kushtetutën”, – tha Ibrahimi.

Anëtari i Gjykatës Kushtetuese nuk la pa përmendur edhe faktin se miratimi me referendum është më i përshtatshëm për ndryshimet kushtetuese.

"Ky është problem kur vjen fjala për zbatueshmëri të Kushtetutës. Miratimi me referendum është më politik për nga natyra dhe më i përshtatshëm në rastet e miratimit fillestar të Kushtetutës, ndërsa votimi në parlament paraqet avantazhe kur amendamente si ai i 2016 është më teknik nga natyra. Stabiliteti politik i Shqipërisë është forcuar dhe kjo i dedikohet kushtetutës dhe mënyrës si miratohet ajo,” – tha Gent Ibrahimi.

Më herët në fjalën e saj kryetarja e Gjykatës Kushtetuese ngriti shqetësimin e përfshirjes së politikës në gjykata. /CNA