web counter
LEXO PA REKLAMA!

SHKARKO APP

App Store
Google Play

E fundit!

x

Energjia, ERE vetëm në gusht tri procedura licencimi për HEC-et dhe dy për impiantet diellore

11 Shtator 2023, 11:41, Aktualitet CNA

Energjia, ERE vetëm në gusht tri procedura licencimi për HEC-et

Projektet e energjisë kanë marrë një ritëm të ri që pas fillimit të krizës në vitin 2021, ku bizneset kanë nxituar me projektet e zbatimit.

Vetëm në muajin gusht, Enti Rregullator i Energjisë (ERE) nisi procedurat për licencim të tri hidrocentraleve dhe dy impianteve diellore me kapacitet të përafërt të instaluar prej 15 MW në total.

Konkretisht, ERE nisi procedurën për licencimin e HEC Selca nga shoqëria Selca Energji, e cila ka rritur kapacitetin nga 1.6 MW në mbi 1.9 MW.

“Në mbledhjen e tij të datës 09.08.2023, Bordi i ERE-s vendosi të fillojë procedurën për modifikimin e licencës së shoqërisë “Selcë energji” shpk në veprimtarinë e prodhimit të energjisë elektrike nga HEC Selca, me vendndodhje në fshatin Selcë, Njësia Administrative Tamarë, Malësi e Madhe, për rritjen e kapacitetit të instaluar të këtij HEC-i nga 1,6 MË në 1,98 MW” thuhej në vendimin e Entit.

Ndërkohë dy HEC-e të tjera por që i përkasin një projekti të përbashkët zbatuar nga Gealb Energy kanë kërkuar licencim për një kapacitet total 9.3MW.

“Në mbledhjen e tij të datës 23.08.2023, Bordi i ERE-s vendosi të fillojë procedurën për licencimin e shoqërisë “Gealb Energy” shpk në veprimtarinë e prodhimit të energjisë elektrike nga hidrocentralet “Guri i Bardhë 1” me fuqi të instaluar 5360KW dhe “Guri i Bardhë 2” me fuqi të instaluar 3940KW, me vendndodhje në pellgun ujëmbledhës të përrenjve të Zallit të Dishit dhe të Shehut (degë e lumit Mat), Fshati Guri i Bardhë, Njësia Administrative Xibër, Bashkia Klos, Qarku Dibër, me kapacitet total të instaluar 9300 kW”, njoftoi Enti.

Dy projekte të tjera i përkasin energjisë fotovoltaike dhe konkretisht impianteve diellore deri në 2MW, të cilët nuk janë objekt koncesioni.

Së pari, Enti njoftoi procedurën e licencimit për Joint Venture 2B 1979 dhe 2T sh.p.k.” në veprimtarinë e prodhimit të energjisë elektrike nga centrali fotovoltaik me kapacitet të instaluar 2 MW, me vendndodhje në zonën Grykë, Bashkia Fier, Qarku Fier.

Së dyti, licencimin e shoqërisë “IDI 2005” sh.p.k. në veprimtarinë e prodhimit të energjisë elektrike nga centrali fotovoltaik “TEKSOEN 1” me kapacitet të instaluar 2 MW, me vendndodhje në njësinë Administrative Povelçë, Bashkia Fier, Qarku Fier.

Licencimet e shoqërive të reja kanë qenë të shumta këtë vit, teksa kriza e energjisë ka bërë që investimet në sektor të rriten.

Kjo ka qenë evidente si në projektet e autokonsumit edhe për projektet me qëllim tregtar. Leverdishmëria e kthimit të investimit është rritur si rrjedhojë e çmimeve që në vitin 2022 arritën rekord në bursat e energjisë, ndërsa këtë vit janë shfaqur më të qëndrueshme, por sërish mbi mesataren historike.

Më të shpejta investimet duket se janë te fotovoltaikët duke i prirë edhe politikës së diversifikimit si një formë për të rritur sigurinë energjetike të vendit që u lëkund në kulmin e krizës së energjisë vitin e kaluar./Monitor.al





Lajmet e fundit nga