E fundit!

14:34 Aktualitet

Edmond Spaho: Edi Rama nuk duhet të japë dorëheqjen

Ish-nënkryetari dhe ish-deputeti i Partisë Demokratike, Ed...

Dimri trokiti/ Pensionistët në Korçë nuk përballojnë dot çmimin e druve: Periudhën e kalojmë me vështirësi

18 Nëntor 2023, 11:17, Aktualitet CNA

Pensionistët në Korçë

Temperaturat janë ulur ndjeshëm mëngjesin e sotëm në qarkun e Korçës, ndërsa kanë filluar edhe reshjet e para në zonat malore me lartësi mbi 1000 metër.

Tani që jemi zyrtarisht në stinën e dimrit, problem i banorëve të Korçës mbeten drutë e zjarrit. E kjo, kryesisht për pensionistët të cilët e kanë të pamundur të përballojnë rritjen e çmimit të druve që arrin deri në 70 mijë lek të vjetra për metër.

City News Albania ka intervistuar disa pensionistë në një lagje të qytetit, të cilët edhe nëpërmjet ironisë, kanë treguar situatën me drutë e zjarrit dhe ngrohjen në banesat e tyre.

"Çmimi i druve ka arritur në 65 mijë lek të vjetra. Unë jam pensionist. S'është e ftohtë kjo, ne jemi argasur në -30 gradë. Jemi brez që i kemi kaluar këto. Duhet ta mbledhin tregtarët që bëjnë këtë punë, ajo është pasuri shtetërore, këta e shesin e marrin paratë.", u shpreh një nga pensionistët.

"Mora 3 metër dru. Kam një sobalkë të vogël dhe s'marr dot më shumë. Mua më shkuan 100 e ca mijë lekë. Me kondicioner nuk ja dalim dot. Në stofë edhe gatuajmë, edhe një byrek e bëjmë, edhe petë petaniku i hapim, se jemi pleq. As 200 mijë lek pension nuk marr. Me të keq ja kalojmë.", tha një tjetër.

Ka edhe një pjesë të pensionistëve të cilët kanë "hequr dorë" nga ngrohja me dru zjarri, dhe kanë preferuar të përdorin kondicionerë, me arsyetimin se kursejnë pak më tepër nga të ardhurat e tyre të pakta.

"Unë kam vënë kondicioner dhe nuk përdor dru. Druja është e shtrenjtë dhe nuk na del hesapi se jemi pensionista. Me mirë me korrent, tani filloi e ftohta dhe besoj do dalim më mirë me kondicioner.", tha një tjetër pensionist.

"Kam bërë në dollap llamarine dhe marr deri në 5 kubikë dru. Pagova gati 135 mijë. Me ato kaloj 1 muaj. Dollapi që kam bërë unë, merrte 3 kubikë. Tani e mbush me 5. Këtu s'ka kontrolle, vjedhin dhe mileti u argas e u mësua. Po të dojë shteti ja mbledh rripat", tha një tjetër.

Sipas të dhënave, disa vite më parë, ccmimi i një metër kubi varionte nga 30-35 mijë lek të vjetra për ahun, ndërsa për dushkun nga 40-45 mijë lek të vjetra. Këtë vit rritja ka qenë e ndjeshme, thuajse 2 fish i ccmimeve të vjetra, ccka ka sjellë vështirësi në blerje nga ana e pensionistëve./CNA