Dëmtimet në Zall Bastar nga tërmeti/ Banorët: Na kërkojnë ryshfet edhe nëse e riparojmë me lekët tona

10 Maj 2023, 14:38, Aktualitet CNA

Dëmtimet në Zall Bastar nga tërmeti/ Banorët: Na

Silvi Bardhi në Zall Bastar

Zëdhënësja e fushatës e kandidatit Belind Këlliçi, Silvi Bardhi, ka qenë në njësinë administrative në Zall Bastar, e cila është një nga zonat e goditura nga tërmeti i tri viteve më parë.

Bardhi ka sjellë shembullin konkret të braktisjes nga bashkia të familjes me gjashtë anëtarë të Xhavit Kodrës, e cila vuan ende pasojat e tërmetit.

Shtëpia e tij është gati e pabanueshme për shkak të çarjes së mureve dhe dëmtimit të rëndë të çatisë. Tri vite nga tërmeti, Bashkia Tiranë dhe Njësia Administrative nuk i kanë dërguar ende një komision për verifikimin e dëmeve.

Sipas Bardhit, duke parë neglizhencën e bashkisë, kryefamiljari është i gatshëm që ta riparojë vetë shtëpinë e tij, por akuzon Bashkinë Tiranë se kërkon ryshfet për t’i dhënë një leje.

Ai thotë se fqinjët e tij janë dëmshpërblyer ndonëse disa prej tyre nuk jetojnë më në Zall-Bastar, por në kryeqytet.

Pjesë nga biseda:

“Kam shkuar te Njësia Zall Bastar dhe më thanë të bësh aplikimin, hiç. Kam shkuar në Tiranë, kam dërguar djalin, fare, hiç. Tani, pasi ka dy ose tre muaj kjo punë, më thirrën djalin poshtë dhe i thanë hajde të bësh aplikimin edhe një herë. Shkova dhe bëra aplikimin sërish, asgjë prapë. Edhe i them vetë gojarisht këtij që herët; Ore si ka mundësi shtëpia ime kështu, apo sepse unë jam i djathtë?”

Silvi Bardhi: Pra shtëpinë tuaj nuk po ju lejojnë as ta riparoni me paratë tuaja? Nuk po ju japin leje? Po pse nuk po ju japin leje?

Xhavit Kodra: Nuk na japin as leje, as asgjë hiç, fare. Duhet të paguash lejen.

Silvi Bardhi: Çfarë pagese duan ata? Kërkojnë ryshfet?

Xhavit Kodra: Po!

I zoti i shtëpisë është i gatshëm ta riparojë vetë shtëpinë ndonëse kushtet ekonomike të familjes Kodra janë të rënda, me pensione, me punë sezonale dhe pa ndihmë ekonomike.

Xhavit Kodra: Nuk më lënë as ta riparoj. Shkoj të nxjerr lejen. Lejen edhe mund ta nxjerr, por jo pa 6 ose 7 milionë lekë që t'i jap e t'ua fus në xhep, jo! As nuk janë interesuar fare. Shkova dhe i thashë atij që hajde më sill komisionin nga poshtë që të shohë shtëpinë time. "Jo, - më tha, - s’kam për të sjellë komision për ta parë!”

Kjo është përgjegjësia e Bashkisë së Tiranës dhe njësive bashkiake ndaj familjeve, të cilat kanë pasur dëmtime të rënda të shtëpive të tyre gjatë tërmetit dhe nuk janë dëmshpërblyer, nuk janë rimbursuar e nuk janë ndihmuar. Rasti i z. Xhavit Kodra, dëshmon situatën reale të familjeve, të cilat janë lënë pas dore nga njësitë bashkiake, por edhe nga vetë Bashkia Tiranë./ CNA.al