CNA e investigoi/ Erion Veliaj, në shpërdorim detyre me vendim

30 Korrik 2025, 12:37, Aktualitet CNA

CNA, në muajin Qershor, publikoi materiale, të dhëna të reja nga një tjetër investigim që të çonte në atë që mund të ishte një akuzë e re për kryetarin e Bashkisë së Tiranës Erion Veliaj.

CNA raportoi se pas akuzave të ngritura për katër nene të rëndësishme të Kodit Penal si kryerja e “Korrupsionit aktiv dhe pasiv i të zgjedhurve vendorë”, “Pastrimi i produkteve të veprës penale”, “Futja e sendeve të ndaluara në qelitë e paraburgimit”, “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, Erion Veliaj ishte kapur nga një gjykatë tjetër në kushtet e shpërdorimit të detyrës dhe konfliktit të interesit.

Investigimi/ Gjykata kap në flagrancë Erion Veliajn, shpërdorim detyre me vendim
19 Qershor, 13:23

Me një vendim të datës 27.03.2025 të gjyqtarit Gentian Hamiti, Erion Veliaj u kap në flagrancë nga Gjykata Administrative e Apelit, pasi ka shpërdoruar detyrën duke ndërhyrë në Planin e Përgjithshëm Vendor, i cili është kompetent për t’u miratuar nga KKT dhe në mënyrë abuzive me një Plan të Detajuar Vendor ka ndërhyrë për të ndërtuar një rrugë.

Sipas PDV-së së miratuar, Njësia Tr-7 kufizohet nga katër rrugë kryesore Rr. “Bardhyl”, Rr. “Derhemi”, Rr. “Hoxha Tahsim” dhe Rr.“Qemal Stafa” dhe e vetmja rrugë e brendshme që përshkon njësinë është Rr. “Faik Tërnova”.

Në PDV Tr-7, rezulton një rrugë inekzistente në brendësi të saj, e cila mbivendoset mbi prona private duke cenuar interesat pasurore të pronarëve të tjerë, anëtarë të shoqërisë.

Pra, kemi një vendim që e firmos kryebashkiaku në kundërshtim me ligjin për të ndërtuar një rrugë, që më tej zbuluam që të çonte në pronat e bashkëshortes së tij, Ajola Xoxa, e cila ia kishte kaluar kushërirt të saj Valmir Xoxa, i cili shëtiste me 140 mijë euro të futura në jastëqe nëpër Tiranë.

Skema/ Si Veliaj firmosi rrugë për pronat e Ajolës
20 Qershor, 13:53

Investigimi i CNA me zbulimin e vendimit të Gjykatës Administrative të Apelit për Veliajn gjendet edhe në vendimin e bërë nga SPAK për Ajola Xoxën dhe Erion Veliaj.

Në të pasqyrohet pikërisht vendimi i Gjykatës Administrative e Apelit e cila kapi në shpërdorim detyre Veliajn.

Sipas analizës së dokumenteve dhe provave të kqyrura nga SPAK, theksohet se:

“Gjithë argumentat sa më lart konfigurojnë Anën objektive të veprës penale të "Shpërdorimi i detyrës", parashikuar nga neni 248 i Kodit Penal. Veprimet konkrete objektive të shtetasit Erion Veliaj, në cilësinë e kryetarit të Bashkisë Tiranëm, provohen të jenë kryer në kundërshtim me ligjin, në mospërmbushje të rregullt të detyrës. Subjekti i veprës penale të shpërdorimit të detyrës është i posaçëm, pra kryerja e veprës penale duhet të realizohet nga personi që ushtron funksione publike. Në këtë rast, shtetasi Erion Veliaj”

Më tej në vendim nënvizohet se arrihet në konkluzionin se Veliaj ka kryer veprime në kundërshtim me ligjin, në mospërmbushje të rregullt të detyrës, të cilat kanë sjellë pasoja që lidhen si me përfitimin material të vetë zyrtarit të lartë vendor dhe familjarëve të tij ashtu si edhe me dëmtimin e interesave të ligjshëm të shtetasve dhe shtetit dhe të gjitha këto akte të çojnë në konsumimin e veprës penale Shpërdorim detyre.

“Për gjithë sa më lart, nga tërësia e veprimeve hetimore nga ku kanë dalë në pah veprimet objektive të shtetasit Erion Veliaj, e analizuar në raport me elementët e figurës së veprës penale, arrihet në konkluzionin se ky shtetas ka kryer veprime në kundërshtim me ligjin, në mospërmbushje të rregullt të detyrës, të cilat kanë sjellë pasoja që lidhen si me përfitimin material të vetë zyrtarit të lartë vendor dhe familjarëve të tij ashtu si edhe me dëmtimin e interesave të ligjshëm të shtetasve dhe shtetit. Këto veprime konfigurojnë elementët e parashikuar nga neni 248 i Kodit Penal, “Shpërdorimi i detyrës"”, thuhet në raportin e SPAK.

Kujtojmë këtu se, gjatë investigimit CNA zbuloi se i njëjti person që e ka paditur dhe e ka gjetur në shkelje të ligjit dhe shpërdorim të detyrës Erion Veliajn, Vilma Rakipi, është po ajo që e mbrojti në gjykatë pas arrestimit kryebashkiakun Erion Veliaj.

Ndërkohë po iu sjellim investigimin e CNA për rastin materiale të cilat do të mund t’i lexoni të plota me dokumente dhe prova në linqet e mëposhtme./ CNA