Pas Felajt edhe motra Laze del nga sistemi, mbetet bashkëshorti i deputetes që nuk plotëson as ai kriteret

29 Korrik 2025, 18:23, Aktualitet CNA

Kolegji i Posaçëm i Apelimit, KPA shpalli vendimin për shkarkimin nga detyra të prokurores së Tiranës Eranda Laze. Eranda Laze është motra e Ermonela Felajt, deputete aktuale e PS, por që në shtator nuk do të jetë më në Kuvend.

Sipas Kolegjit, është i drejtë pretendimi i institucionit të Komisionerëve Publikë dhe drejtuesit të SPAK se prokurorja Laze dhe bashkëshorti i saj janë në pamundësi për të vërtetuar burimet financiare të ligjshme për pagesën e këstit të parë të një apartamenti në vlerën 40 mijë euro dhe për këstin e fundit.

Sipas “Birn”, po ashtu, Kolegji ka gjetur të drejtë dhe shkakun e ankimit për pamundësinë e krijimit të gjendjes cash, për arsye të mosvërtetimit të ligjshmërisë së të ardhurave të bashkëshortit nga avokatia. Sipas KPA, për këto të ardhura nuk u provua shlyerja e detyrimeve tatimore.

Për një ngastër toke dhuruar bashkëshortit, trupi gjykues i KPA vlerëson se subjekti nuk shpjegoi bindshëm marrëdhënien e bashkëshortit me dhuruesit.

Kolegji vlerëson se dhe për një ndërtim informal në proces legalizimi, vetëdeklaruar nga babai i bashkëshortit të subjektit, nuk u dhanë shpjegime për arsyet e investimit së bashku me një shtetase tjetër të një garazhi në një vend turistik, edhe pse ai jeton në Itali.

Megjithëse u konstatua se tregojnë për pakujdesi, pra të pamjaftueshme për masë, në raport janë evidentuar dhe udhëtimet me persona të dyshuar si të përfshirë në veprimtari kriminale.

Për këto motive u vendos ndryshimi i vendimmarrjes së Komisionit të Pavarur të Kualifikimit dhe shkarkimi nga detyra i këtij subjekti rivlerësimi.

Laze u konfirmua në detyrë nga Komisioni i Pavarur i Kualifikimit, KPK më 8 nëntor të vitit të kaluar.

Shumica e trupës së KPK i gjeti bindëse shpjegimet dhe provat e dorëzuara nga subjekti, duke e reduktuar pamundësinë në rreth 1.5 milionë lekë, që u konsiderua në përfundim jo penalizues.

Ndërsa pakica çmoi se Laze nuk arriti të provojë ligjshmërinë e burimeve për dy apartamente banimi në Tiranë, të blera për vlerën 81,284 Euro dhe të një automjeti.

Vendimi i shumicës së Komisionit u gjet i pabazuar dhe nga Operacioni Ndërkombëtar i Monitorimit që pasi evidentoi probleme për pasurinë dhe etikën, u kërkoi Komisionerëve Publikë përmes një rekomandimi, që të ushtronin ankim në Kolegj./ CNA