“Prostitucioni, me ritme alarmante në Shqipëri”/ Lekatari: Shteti po përgatit një ndryshim të rrezikshëm në Kodin Penal

29 Korrik 2025, 09:43, Aktualitet CNA

“Prostitucioni, me ritme alarmante në Shqipëri”/ Lekatari:

Zhaklin Lekatari

Gazetarja dhe aktivistja Zhaklin Lekatari ka ngritur alarmin duke thënë se prostitucioni në Shqipëri po shtrihet me ritme të larta në qytete si Tiranë, Elbasan, Durrës.

Ky aktivitet po maskohet pas Airbnb-ve, salloneve estetike dhe rrjeteve online, ndërsa rendit problematikat serioze shëndetësore që sjell ky aktivitet i paligjshëm.

“Prostitucioni në Shqipëri nuk është më një çështje e fshehtë. Ai po shtrihet me ritme alarmante në qytete si Tirana, Elbasani, Durrësi, duke u maskuar pas Airbnb-ve, salloneve estetike dhe rrjeteve online. Por kjo nuk është thjesht histori 'vajzash që e zgjedhin vetë'. Është një histori e institucioneve që nuk duan të shohin, nuk duan të kuptojnë dhe nuk duan të ndërhyjnë. Ndërkohë ne kemi disa probleme serioze shëndetësore dhe sociale në rritje:

1. Infeksionet seksualisht të transmetueshme po shtohen. Nuk ka kontroll mjekësor, nuk ka edukim seksual, nuk ka as protokoll për ndjekjen e rasteve të dyshimta.

2. Vajzat e shfrytëzuara nuk marrin asnjë ndihmë pas arrestimit. Ato procedohen penalisht dhe më pas braktisen shpeshherë pa dokumente.

3. Trafikimi i qenieve njerëzore po gjen terren të butë. Shumica e vajzave janë të huaja, të rekrutuara përmes premtimeve false dhe të dërguara në Shqipëri si destinacion transit drejt BE-së.

Institucionet? Ose janë të vonuara, ose janë të përfshira.

Po, arrestohen edhe burrat. Por ajo që nuk ndodh kurrë është ndërtimi i një politike të qartë për menaxhimin e fenomenit:

S’ka strategji për rehabilitimin e viktimave. S’ka sistem referimi midis policisë, shëndetësisë dhe shërbimeve sociale. S’ka databazë për ndjekjen e sëmundjeve seksualisht të transmetueshme. S’ka mbështetje psikologjike, ligjore apo sociale për gratë e shfrytëzuara”, shkruan Lekatari.

Nga ana tjetër, Lekatari thekson se kjo gjë po ndodh në të njëtën kohë që shteti po përgatit një ndryshim të rrezikshëm në Kodin Penal, jo vetëm dekriminalizimin e punës seksuale, por edhe legalizimin e saj, pa u konsultuar me viktimat, pa pasur politika sociale, pa sistem referimi institucional dhe ende pa debat publik të ndershëm.

“E gjithë kjo po ndodh në të njëjtën kohë kur shteti shqiptar po përgatit një ndryshim të rrezikshëm në Kodin Penal: jo vetëm dekriminalizimin e punës seksuale (pozitiv), por edhe legalizimin e saj, pa u konsultuar me viktimat, pa pasur politika sociale, pa sistem referimi institucional dhe ende pa debat publik të ndershëm. Pyetja që duhet të bëjmë sot është: Kush ka kërkuar legalizimin e punës seksuale në Shqipëri? Gratë, punëtoret, viktimat apo burrat që blejnë seks?”, përfundon ajo./ CNA