web counter
LEXO PA REKLAMA!

SHKARKO APP

App Store
Google Play

E fundit!

x

KLSH: Klevis Jahaj i fali 2.2 milionë euro Gjikurisë

28 Korrik 2025, 15:42, Aktualitet CNA

KLSH: Klevis Jahaj i fali 2.2 milionë euro Gjikurisë

Kontrolli i Lartë i Shtetit ka denoncuar Agjencinë Kombëtare të Ujësjellës Kanalizimeve se i ka falur në mënyrë të paligjshme 2.2 milionë euro penalitete kompanisë Gjikuria.

Sipas KLSH-së, këto ishin gjoba që kompania duhet t'i kishte paguar për shkak të vonesave 3-vjeçare në realizimin e dy kontratave publike, Impiantin e trajtimit të ujërave të ndotura dhe sistemi KUZ, Drimadhë, Dhërmi si dhe “Furnizimi me ujë i zonave turistike Drimadhes, Dhërmi dhe përmirësimi i rrjetit të ujësjellësit të fshatit Dhërmi”.

KLSH: Klevis Jahaj i fali 2.2 milionë euro Gjikurisë

 

Pjesë nga raporti i KLSH-së

Nga auditimi i kontratave KLSH ka konstuatuar se të dyja këto investime janë me vonesë mbi 3 vjeçare nga afatet e kontratës duke i shkaktuar një dëm të madh buxhetit të shtetit dhe qytetarëve në formën e mosmarrjes së shërbimit.

Përmes një raporti të posaçëm auditimi KLSH i ka kërkuar Agjencisë Kombëtare të Ujësjellës Kanalizimeve që të nisë menjëherë procedurat për arkëtimin e këtyre penaliteteve, të cilat përbëjnë dëm të pastër ekonomik për buxhetin e shtetit.

Që nga tetori i vitit 2021, AKUM është drejtuar nga Klevis Jahaj, i cili në këto zgjedhje u zgjodh deputet nga radhët e Partisë Socialiste në qarkun e Fierit.

Tenderat
Të dy tenderat u zhvilluan në gusht të vitit 2020 dhe kishin një faturë të kripur për qytetarët. Më konkretisht, kontrata për Impiantin e trajtimit të ujërave të ndotura dhe sistemi KUZ, Drimadhë, Dhërmi u nënshkrua në 17 gusht të vitit 2020 mes AKUM dhe kompanisë së shpallur fituese, Gjikuria.

Kjo kontratë kishte një vlerë prej 4 milionë eurosh dhe sipas kontratës, investimi duhet të përfundonte brenda 12 muajve nga data e fillimit të punimeve. Por edhe pse punimet nisën zyrtarisht në 1 shtator të vitit 2020, ky investim nuk ka përfunduar akoma.

"Kontrata me nr. 2135, datë 17.08.2020, me objekti “Impiant i trajtimit të ujërave të zeza dhe sistemi KUZ Drimadhë, Dhërmi”, ku rezulton se subjekti është 796 ditë me vonesë, konfirmuar kjo edhe nga grupi i punës i ngritur në AKUK për monitorimin dhe zbatimin e kësaj kontrate. Vlera e pa aplikuar e penalitetit ndaj Operatorit Ekonomik, është 159,321,194.78 lekë ose 1,593,211.95 Euro, të cilat konsiderohen të ardhura të munguara në buxhetin e shtetit," thuhet në raportin e KLSH.

Por ky është vetëm një nga investimet që Gjikuria ka lënë rrugëve. Projekti tjetër është ai për furnizimim me ujë i zonave turistike Drimadhes, Dhërmi dhe përmirësimi i rrjetit të ujësjellësit të fshatit Dhërmi. Ky tender kishte një vlerë prej 2.25 milionë euro dhe kontrata u lidh po në gusht të vitit 2020.

Këtë herë fitues i tenderit u shpall një bashkim prej 3 kompanish i përbërë nga Gjikuria, 4 A-M dhe Rej, me Gjikurinë si operator lider.

"Sipas korrespondencës, si dhe duke marrë si datë të përfundimit të punimeve datën 30.03.2023, operatori ekonomik është 456 ditë me vonesë. Vlera e penaliteteve e pavendosur nga Autoriteti Kontraktor është 61,831,577.41 lekë ose 618,315.77 Euro," thuhet në raportin e auditit të KLSH.

Në total për të dy kontratat bëhet fjalë se kompanisë Gjikuria i janë falur mbi 2.2 milionë euro penalitete për mospërmbushje të kontratës.

Por pavarësisht kësaj, Agjencia e Ujësjellës Kanalizimeve jo vetëm që nuk i ka mbajtur penalitet kompanisë, por ka vazhduar ta furnizojë atë me kontrata të majme. E fundit në radhë ishte ajo e “Furnizimit me ujë të zonave bregdetare, Zonat e Investimit Strategjik Draleos, Drimadhes dhe Dhërmi, Faza e Parë, viti 2023 me vlerë 7.5 milionë euro.

KLSH thotë se kjo kontratë i është dhënë kompanisë Gjikuria në shkelje të plotë të ligjit. "Vetë AKUK është i qartë dhe ka dijeni për këtë kompani që nuk respekton afatet në zbatimin e kontratave, pra nuk jep garanci në këtë zbatim. Edhe pse janë këto fakte, e përzgjedh përsëri fitues në procedurën e prokurimit të zhvilluar në tetor 2023, me objekt” “Furnizimi me ujë të zonave bregdetare, Zonat e Investimit Strategjik Draleos, Drimadhes dhe Dhërmi, Faza e Parë,” thotë KLSH në raport.

KLSH: Klevis Jahaj i fali 2.2 milionë euro Gjikurisë

Në fund, KLSH i ka rekomanduar Agjencisë Kombëtare të Ujësjellës Kanalizimeve që të nisë menjëherë procedurat për të arkëtuar 2.2 milionë euro penalitete nga kompani Gjikuria dhe të marrë masa disiplinore ndaj punonjësve që kanë toleruar këtë situatë./ Kapital.al





Lajmet e fundit nga