Berisha, thirrje studentëve: Ngrihuni fuqishëm në protesta kundër kësaj qeverie përbuzëse

2 Tetor 2023, 12:33, Aktualitet CNA

Berisha, thirrje studentëve: Ngrihuni fuqishëm në protesta

Ish-kryeministri Sali Berisha

Ish-kryeministri Sali Berisha në një deklaratë për mediat u ka bërë thirrje studentëve, gjimnazistëve dhe familjarëve të tyre të ngrihen në protesta.

Sipas tij studentët duhet të ngrihen kundër kësaj qeverie përbuzëse ndaj tyre dhe të ardhmes së tyre.”

“Një thirrje e fuqishme për të rinjtë e universiteteve për gjimnazistët dhe familjarët të ngrihen fuqishëm në protesta. Këto që po ndodhin janë shkatërrim masiv i ëndërrave më të bukura të të rinjve shqiptarë mbi të cilat duhet të ndërtohet e ardhmja e të rinjve nesër. PD do të japë përgjigjet që meritojnë. Studentët të ngrihen kundër kësaj qeverie përbuzëse ndaj tyre dhe të ardhmes së tyre.”

Sipas Berishës “vendosja e detyrimeve ndaj studentëve të Mjekësisë për të firmosur rikthimin e shpenzimeve nëse pas diplomimit, nuk pranojnë të punojnë në vendin e tyre është akt shkatërrimtar për sistemin e shëndetësisë në Shqipëri.

“Universitetet e vendit hapen sot në kushtet kur autonomia e tyre është asgjësuar plotësisht.

Kur qeveria ka vendosur kontroll të plotë nëpërmjet bordeve korruptive mbi universitetet dhe autonominë e tyre.

Një akt tjetër i shëmtuar, totalitar, i pashembullt në Evropë, është vendosja e detyrimeve ndaj studentëve të Mjekësisë për të firmosur rikthimin e shpenzimeve nëse pas diplomimit, nuk pranojnë të punojnë në vendin e tyre.

Ky është akt totalitar, akt i cili nuk ekziston në asnjë vend tjetër.

Ky është akt shkatërrimtar për sistemin e shëndetësisë në Shqipëri.

Ky akt ka bërë që qindra e qindra studentë, ekselentë ndër të tjerë, t’u drejtohen universiteteve të Evropës, për diplomim në fushën e mjekësisë.

Qindra e qindra të tjerë u janë drejtuar universiteteve private. De facto është shkatërrimi i Fakultetit të Mjekësisë dhe sistemit të shëndetësisë në të ardhmen.”

Ai u bëri thirrje të gjithëve të solidarizohen me studentët e Mjekësisë.

“Sot, studentët e Mjekësisë kanë bojkotuar mësimin. Solidariteti im është i plotë me ta.

U bëj thirrje mjekëve dhe infermierëve në mbarë vendin të solidarizohen me studentët. Të mos harrojnë se sot janë ata, por nesër duhet të zëvendësohen nga ata që po ikin.

Nesër pra, spitalet tona do mbeten bosh. Nesër kujdesi shëndetësor do të vuajë shumë më tepër se sot. Se detyrimi i studentëve për të firmosur kontratë është një akt tipik totalitar diktatorial.

Unë u bëj thirrje studentëve të universiteteve të solidarizohen me studentët e mjekësisë, të mos pranojnë këtë vendim absurd që synon të kontrollojë ëndrrën dhe vullnetin e tyre.

Nuk është zgjidhja kontrata, zgjidhja është rritja e rrogave. Rritja dhe vetëm rritja e rrogave!

Nëse qeveria do shkurtonte shpenzimet e tmerrshme të Edi Ramës dhe qeveritarëve të tjerë, ato do mjaftonin për dyfishimin, trefishimin e rrogave të mjekëve.

Mjekët duhet të paguhen që të japin shërbimet e duhura dhe të qëndrojnë.”/ CNA