Revolta e Spaçit dhe Qafë-Barit ndezin debatin/ Rama revoltohet ndaj Leskajt: Laj gojën para se të flasësh

23 Maj 2022, 18:29, Politikë CNA

Një debat i ashpër është regjistruar gjatë mbrëmjes së sotme në seancën parlamentare mes kryeministrit Edi Rama dhe deputetit të Partisë Demokratike, Bujar Leskaj.

Leskaj përkujtoi Revoltën e Qafë-Barit dhe atë të Spaçit dhe i quajti ato dëshmi të qëndresës në vitet e diktaturës.

?Sot është një datë të cilën duhet ta përkujtojmë. Dy janë ngjarjet që dëshmojnë se edhe në vitet e diktaturës kishte revolta dhe qëndrestarë. Kujtoj revoltën e Spaçit është 49-vjetori i saj dhe 38-vjetori i Revoltës së Qafë-Barit. Ky përkujtim imi ishte veracion për ta dhe besoj ju të gjithë jeni në një mendje?, u shpreh ai, ndërsa kjo gjë solli një reagim të fortë të kreut të qeverisë.

Rama tha se deputeti i PD-së duhet të lajë gojën fillimisht dhe më pas të flasë për ata që dhanë jetën.

?Meqë zoti Leskaj bëri thirrje të bashkohem me të, ndaj e mora fjalën të bashkohem me të dhe të ndahem. Të bashkohem në respekt të emrave që përmendi dhe të ndahem pasi gjithë vëmendjen e tyre që janë të paharruar humbet çdo kuptim kur ata që i përmendin nuk jetojnë me idealet, parimet, qëllimet dhe shembullin e tyre. Ju flisni këtu për ata, por ata donin një Shqipëri ku e drejta e pronës ishte e garantuar, ju përfaqësoni këtu partinë që e shkatërroi të drejtën e pronës. Ata donin një Shqipëri që të mos ishin si këmbët e dhisë, ju nuk patët kurajën të hapnit dosjet e sigurimit të shtetit të cilat i hapëm ne. Ju i mbajtët mbyllur.

Ata luftuan për një Shqipëri të drejtë, ju duhet të bëni edhe një listë të atyre që vdiqën në demokraci dhe nuk morën asnjë lekë shpërblim nga ju. Ata donin një Shqipëri të orientuar nga Perëndimi dhe jo nga Lindja dhe ju sot përfaqësoni palën antiamerikane në krahun tuaj dhe jeni krenar në krah të atij që e ngritët si flamur dhe në vend të logos së PD-së ka damkën e DASH-it dhe si i korruptuar domethënës dhe kur mendoj të gjitha këto se si më duket që ju rreshtoni emra të vdekurish në ferrin e komunizmit dhe na kërkoni të bashkoheni, jo bashkohuni ju me ta. Kështu laje mirë njëherë gojën për të gjitha ato që ke thënë në mbështetje të atij flamuri të rreckosur dhe pastaj flisni për ata që dhanë jetën?, theksoi kryeministri.

Pas kësaj replike të ashpër, ka ardhur një tjetër reagim i Leskajt, i cili deklaroi: ?Kryeministër nuk fola për të vdekur të zakonshëm, fola për heronj, i përmenda ato emra dhe do t’i përmend gjithmonë, detyrimi moral është i të gjithëve. Janë heronj, nuk janë vdekatarë të zakonshëm, jeni ju, jemi ne që do të ikim pa lënë gjurmë nga kjo jetë. Heronjtë e vërtete të antikomunizmit janë ata?./ CNA.al