E fundit!

11:58 Aktualitet

ABI Bank ka refuzuar të paguajë gjobën 120 milionë për një portal gjobaxhi

ABI Bank ka refuzuar të paguajë gjobën 120 milionë për një...

Pse Alibeaj, pretendon që PS ka ndryshuar qëndrim?

20 Maj 2022, 15:03, Opinione CNA

Para dy ditëve u duk sikur mazhoranca dhe opozita ranë dakord për mënyrën se si do vijonin negociatat për zgjedhjen e Presidentit të ri të Republikës.

Por CNA.al arriti të identifikojë dy qëndrime të ndryshme të përfaqësuesve të PS në komisionin negociator.

Ajo që ngjalli kuriozitet ishte artikulimi i përfaqësuesve të mazhorancës.

Taulant Balla gjatë gjithë negociatës së zhvilluar live sipas kërkesës Alibeajt, nuk kujdesej të caktonte numër kandidaturash.

Taulant Balla në cilësinë e kryetarit të grupit negociator edhe atë ditë edhe më pas, mbajti të njëjtin qëndrim dhe artikuloi vetëm një shprehje. Balla përqëndrohej thjesht tek dispozita kushtetuese që paracakton 20 firma propozuese duke shtuar se ne 2 raunde PS nuk do te dilte me asnjë propozim kandidature.

Gjiknuri nga ana tjetër në disa dalje edhe publike dukej si i përfshirë në disa negociata të tjera dhe orientonte Alibeajn.

Gjiknuri para disa ditësh i hapi dritaren edhe kandidaturave që mund të dilnin nga “Rithemelimi” duke i sugjeruar grupimit pas Alibeajt që të ishin ata që të përfshinin në propozimet e tyre, kandidaturat që mund të vinin nga Rithemelimi.

Alibeaj në nisje të procesit nxorri një skemë propozimi për Presidentit që konsistonte në propozimin e 4 emrave nga PD. PS sipas asaj skeme, mund te skualifikonte 2, dhe në negociatë të vendosej për kandidatin konsensual.

Kjo skemë u hodh poshtë nga Rama dhe Taulant Balla me arsyetimin se ajo i hiqte PS të drejtën e propozimit të emrave. Më pas formulimi i konkluzionit të negociatave nga Balla, qëndronte në të njëjtat pozicione të mbajtura gjatë mbledhjes në Kryesinë e Kuvendit.

Negociata sipas dialogut Balla-Alibeaj, ishte e qarte që konkludoi në të drejtën e opozitës që të propozonte në raundin e dyte dhe të tretë dhe në rastet kur nuk bihej dakord, PS rezervonte të drejtën të zgjidhte e vetme në raundin e katërt dhe/ose të pestë.

Por CNA.al tërhoqi vëmendjen tek ndërhyrja në fund e Damian Gjiknurit i cili çuditërisht gjatë mbledhjes në Kuvend me përfaqësuesit e opozitës, riktheu shifrën 4 për kandidaturat që do të propozonte Alibeaj!

Ndërhyrja e tij dukej se orientonte Alibeajn për mënyrën se si Alibeaj duhet të organizonte propozimin. Me të njëjtin stil siç i sugjeroi para ca ditësh që të ish Alibeaj që mblidhte propozimet e Rithemelimit!

Dje gjatë mbledhjes me anëtarë të grupit parlamentar të PD, Alibeaj, u prezantoi atyre skemën e Gjiknurit dhe nuk ju citoi fjalitë e Taulant Ballës.

Pse e bëri këtë Alibeaj?

Negociata u zhvillua si proces parlamentar dhe jo partiak.

Për këtë shkak kryetar i grupit negociator ishte Balla i cili nuk foli për 4 kandidatura, por për 20 firma.

Duhet të kuptohet qartë që qëndrimi i Ballës nga ai i Gjiknurit ishin qartësisht të ndryshme.

20 firmat që kujtonte Balla duke cituar Kushtetutën, kushtëzonin vetëm 1 kandidaturë nga grupi Alibeaj.

4 emrat që sugjeronte Gjiknuri, eventualisht do kërkonin 80 firma (nga 20 secili).

Zoti Gjiknuri në atë grup ishte dëshmitar, jo aktor.

Njerëzit që ka Alibeaj në krah gjatë negociatës, nuk flasin sepse edhe ata janë dëshmitarë të procesit.

Kjo është pjesë ABC-së së manualit të negociimit, që çdo politikan negociator e di përmendësh.

Çfarë e shtyu Alibeajn të besonte se po negocionte me Gjiknurin?

Kur gjithë pubkiku kuptonte që po negocionte me Ballën?

Edhe nga Foltorja Alibeaj sistematikisht akuzohej per negociatat me Ballën dhe për faktin që po pranonte kushtet e Ballës. As Foltorja nuk e citonte Gjiknurin!

Denoncimi i sotëm i Alibeajt per atë që ai e quan “ndryshim të pozicionit të PS”, dëshmon në rastin më të mirë që Alibeaj negociatat nuk i bën gjatë shfaqjeve me Ballën, të cilat i kërkon ti zhvillojë live, por në biseda të fshehta më Gjiknurin ose të dërguarit e tij.

Në rastin më të mirë kjo është tradhëti ndaj publikut dhe parimeve rë transparencës që vetë Alibeaj proklamoi.

Opsioni tjetër mbetet paaftësia e rëndë që ka Alibeaj në negociim e cila nga përmasat që shfaq duket e pariparueshme, sidomos kur rezulton se vetë negociatori nuk njeh pikën e parë të nanualit të negociimit.