E fundit!

08:25 Kosova & Bota

SHBA drejt heqjes së ndryshimit të orës, Dhoma e Përfaqësuesve miraton projektligjin

Dhoma e Përfaqësuesve në SHBA ka miratuar një projektligj ...

REPORTAZH- Magjia e liqenit dhe aktivitetet sportive/ Një ditë ndryshe në Pogradec

26 Gusht 2021, 11:45, Kulturë CNA

Aktivitetet sportive janë ato që mbajnë gjallë të rinjtë të cilët nuk kërkojnë më të zhyten në teknologji, por duan adrenalinë dhe eksperienca të reja. Krahas sporteve malore si hiking, edhe sportet ujore janë tepër të vlerësuara dhe të zhvilluara në qytetin e Pogradecit. Bashkia është ajo që fokusin kryesor po e drejton tek jeta sportive për të gjithë të rinjtë, duke organizuar maratona mes këtyre të fundit.

Kjo e mërkurë i ka gjetur të rinjtë në një organizim në Pogradec, me aktivitete të ndryshme të sporteve ujore si Stand Up Paddle, Sup, Kajak etj. Këto janë konsideruar si disa nga llojet më të preferuara që ata zgjedhin për të kaluar një ditë ndryshe nga monotonia, dhe plot me emocione që mund ti falë liqeni.

Loridela Beqari, drejtoresha e turizmit në bashkinë e Pogradecit tregon për CNA.al rëndësinë e madhe që kane këto aktivitete për të apasionuarit ndaj sporteve ujore, duke theksuar faktin se të tilla aktivitete interesante do të zhvillohen çdo vit, si një risi për qytetin liqenor.

?Është një aktivitet që ne po mundohemi ta kthejmë në një traditë për qytetin e Pogradecit. Këto sporte kanë ekzistuar më parë, por ne po përpiqemi ti rikthejmë në një risi që të rinjtë të jenë sa më të shëndetshëm dhe pse jo, të eksplorojnë të gjitha atraksionet që ofron Pogradeci. Ne synojmë që me eksperiencat e krijuara në të tilla aktivitete, të konceptojmë maratona të ndryshme të kanotazhit, të cilat do të nxisnin konkurrencën e të rinjve në qytet.? ? shprehet Beqari.

Sporte të tilla të largojnë nga rutina e përditshmërisë, por ofrojnë edhe adrenalinë, kështu e përcaktojnë të rinjtë që ishin pjesë e këtij organizimi.

?Duke patur parasysh që është viti i dytë në qytetin e Pogradecit që na jepet mundësia të marrim pjesë në aktivitete të tilla të sporteve ujore, personalisht e shoh si një eksperiencë mjaftueshëm të bukur. Kjo për të vetmin fakt sepse më largon mua nga monotonia e ditëve të përditshme, pasi të rinjtë sot pothuajse gjithë kohën janë në rrjete sociale. Ky sport na jep atë mundësinë e madhe jo vetëm për të hequr dëshirën ndaj teknologjisë dhe telefonave, por nëpërmjet këtyre sporteve mund të shikojmë edhe bukuritë e rralla të liqenit në brendësi të tij.?-tregon Mateos Yskollari.

Një tjetër pjesëmarrëse në këtë aktivitet ishte Joana Yskollari e cila me shumë kënaqësi na tregoi emocionet që përjetoi gjatë kësaj eksperience.

?Për një vajzë sportet ujore janë të vështira në pamje të parë, vajzat në fakt mund të bëjnë jo vetëm sportet ujore por edhe sporte të tjera akoma më mirë. Është një eksperiencë shumë e bukur dhe aspak e vështirë. Mendoj se të gjithë të rinjtë duhet ta provojnë dhe ta shijojnë. E kjo më tepër gjatë sezonit të verës pasi shijojnë edhe ujin njëkohësisht dhe merren më aktivitete sportive. Ka shumë adrenalinë, të cilën e ndjeva kur u futëm pak më thellë në liqen. Dhe më kryesorja është që frika nuk duhet të mposhtë dëshirat e të rinjve për këto lloj sportesh ujore.? ? thotë Joana.

Promovimi që i bëhet këtyre organizimeve ka për qëllim jo vetëm përfshirjen e të rinjve në aktivitete, por edhe të afrojë sa më shumë turistë në sezonet turistike të çdo qyteti.

Pogradeci këtë vit ka shënuar një rritje të numrit të vizitorëve, të cilët nëpërmjet guidave të ndryshme kanë vizituar pikat më interesante të qytetit liqenor, duke filluar në brendësi të qytetit, e duke vazhduar me fshatrat turistikë afër tij, po ashtu edhe me zonat e thella malore që shfaqin një natyrë magjepsëse./CNA.al