E fundit!

07:07 Sociale

Reshje në formën e shtrëngatave/ Moti për ditën e sotme

Ditën e sotme vendi ynë do të ndikohet nga pothuajse e një...

REPORTAZH- Nga peisazhi magjepsës tek kulinaria/ Boboshtica, fshati i pasur i Korçës

26 Gusht 2021, 08:31, Kulturë CNA

Fundjava në një fshat çlodhës, larg zhurmës së qytetit, mund të kalohet mrekullisht në fshatin turistik të Boboshticës. Ky fshat, vetëm 7 km larg qytetit të Korçës, ofron një peisazh të mrekullueshëm që zgjon kuriozitet për mjaft vizitorë.

Tradita e rakisë së manit, kishat e shekullit të XIV, dhe kulinaria e veçantë e bëjnë akoma më të preferuar Boboshticën, që vitet e fundit duket se është braktisur nga të rinjtë por fanatikë të jetës në fshat kanë mbetur mosha e tretë. Për më tepër, natyra është ajo që i jep bukuri fshatit në çdo stinë të vitit, me ajërin e pastër e me gjelbërimin e pemëve rreth e përqark.

Gjatë vizitës tonë në këtë fshat të mrekullueshëm, takuam njërin prej banorëve, i cili na shoqëroi gjatë kohës që qëndruam aty, duke na treguar më tepër për historinë e fshatit dhe traditat që ai mbart. Theodhor Guna, tashmë 72 vjeçar, por që në dukje më i ri, thotë se vetë ky fshat e ka mbajtur gjallë atë dhe të moshuarit e tjerë të zonës.

?Boboshtica është një fshat shumë i bekuar, sepse ka brenda saj manat, kaçkat, ujin e çezmave 24 orë dhe është një fshat i pastër. Është një fshat që ka 8 kisha, 6 taverna që afrojnë vizitorët nga të gjitha qytetet. Ka qënë një fshat me kulturë, dhe kishte rreth 300 kuadro me pozitë deri në ministry, me prokurora, gjyqtarë, inxhinierë, si familja e Ilo Kuneshkës, i cili ka qënë inxhinieri më i mirë në Shqipëri.

Ai ishte kaq shumë i përgatitur sa montoi fabrikën e trikotazhit, filaturën dhe uzinën e preçizionit.

Fshati tonë nuk ka qënë asnjëherë keq, por që kur kërkuam të vinte demokracia ?nxorrëm sytë me dorën tonë?. Banorët që dikur kanë qënë rreth 1200 vetë, u larguan sepse këtu u mbyllën punët. Ka patur shumë punë edhe pse me rroga të vogla, por ka patur miniera qymyri e bakri dhe shumë fabrika të ndryshme që u mbyllën dhe lanë në baltë gjithë banorët.? ? tregon me keqardhje Theodhori.

Tradita e famshme e rakisë së manit nuk është shuar edhe sot e kësaj dite në këtë fshat turistik, me pjesën më të madhe të familjeve që e mbledhin manin dhe e kthejnë në raki që preferohet shumë jo vetëm nga rrethi i Korçës, por edhe nga qytete të tjera të Shqipërisë.

?Fshati është i gjithi i përbërë nga manat, mund të them se janë gati 1mijë rrënjë që kujdesen banorët. Vlerat që ky lloj fruti ka për shëndetin e njerëzve janë të pallogaritshme, aq sa të gjithë çuditen kur shohin se janë shëruar nga rakia. Manat janë shekullore, më tepër se 800 vjeçare, dhe është një pemë shumë me rëndësi për shëndetin.

Nëse konsumoni disa kokrra çdo mëngjes, ato të bëjnë mirë për gjendrat tiroide, dhe nëse pini raki mani, ajo është kundër diabetit. Ka edhe raste kur njerëzit janë të sëmurë me grip, nëse fërkoni kraharorin me raki mani, do të shihni që sëmundja do të kalojë brenda dy ditësh.? ? thotë Theodhori.

Në Boboshticë krahas shtëpive karakteristike me gurë, oborre të gjelbëruara, gjejmë edhe disa taverna që presin vizitorët gjatë ditëve të pushimit. Gjatë sezonit turistik, ky fshat gjallërohet nga turistët vendas e të huaj, ndërsa gjatë dimrit të vetmit që mund të shihen duke ecur në rrugët e ngushta të fshatit janë ata pak të moshuar që i kanë qëndruar besnik jetës së tyre atje./ CNA.al