Rinumërimi i votave në Berat/ Braimllari: Vërtetoi grabitjen e mandatit të LSI në tavolinë

21 Maj 2021, 18:23, Politikë CNA

Sekretari i Përgjithshëm i LSI-së, Endrit Braimllari, ka reaguar pas rinumërimit të votave në qarkun e Beratit ku u vërejt një rënie e votave të PD-së dhe PS-së dhe një ngritje e lehtë e LSI-së, e cila sërish nuk arriti të siguronte një mandat.

Por pavarësisht se LSI nuk fitoi asnjë mandat deputeti, Braimllari tha në një deklaratë për mediat se trajtimi i ankesave të LSI nga ana e KAS ka vërtetuar se mandati i LSI është grabitur në tavolinë.

Ai pretendon se ky proces tregon manipulimin e zgjedhjeve, ndërsa hedh akuzat se KAS po hesht duke zbatuar një urdhër politik dhe duke u bërë pjesë e asaj që ai e quan shkatërrim të procesit zgjedhor.

?I gjithë procesi i trajtimit të ankesave të LSI nga ana e KAS vërtetoi se mandati i LSI është grabitur në tavolinë.

Vendimmarrja e KAS, për të quajtur të vlefshme 24 qendra votimi të mbushura nga Rilindja të faktuara dhe të vërtetuara nga procesverbalet dhe nga informacioni zyrtar, i firmosur nga numëruesit dhe komisionerët e PS vërtetoi të gjitha pretendimet tona.

Në 24 qendra votimi në qarkun e Beratit të vertetuara ka 115 shkelje të rënda të cilat vërtetojnë qartazi ndërhyrjen në proces dhe brenda në kuti.

Është i vërtetuar, fakti kriminal që 19 shtetas votojnë 54 herë ndërkohë që ka me qindra informacione të tjera për votime të së njëjtës natyrë në të gjitha qendrat e votimit në qarkun e Beratit.

Është vërtetuar që ka më shumë fletë votimi në kuti sesa votues, në Berat dhe në të gjithë Shqipërinë.

Është vërtetuar që janë dorëzuar kuti me fletë votimi më shumë sesa janë marrë në dorëzim. Pra, edhe një herë kutitë janë mbushur nga Rilindja duke na kthyer pas në kohët më të errëta të zgjedhjeve në Shqipëri.

Këto fakte tronditëse, nuk janë marrë parasysh nga KAS, i cili heshti duke zbatuar një urdhër politik dhe u bërë pjesë e shkatërrimit të procesit zgjedhor dhe grabitjes së mandatit të LSI.

Ne nuk do të ndalemi, do ta vazhdojmë betejën tonë në Kolegjin Zgjedhor ku do të paraqesim fakte konkrete për pavlefshmëri të procesit. LSI është e vendosur për t?i shkuar deri në fund zbardhjes të së vërtetës dhe për të çuar në vend vullnetin e qytetarëve?, thekson ish-deputeti./ CNA.al

Rinumërimi/ Berati, fakti që rrëzon alibinë politike të Bashës