“E vetmja shpresë për ndryshimin”/ Topalli: Falënderoj ekipin për kurajën

23 Prill 2021, 19:15, Politikë CNA

Drejtuesja e Lëvizjes për Ndryshim Jozefina Topalli ka falënderuar të gjithë ekipin e saj për kurajën për të qenë kundër një politike të kalbur dhe të korruptuar. Ajo shkruan se Lëvizja për Ndryshim është e vetmja shpresë për të nisur Ndryshimin.

Topalli tha se shqiptarët janë të fyer nga arroganca e tre krerëve të cilët në tre dekada kishin çdo gjë në dorë.

“Në orët e fundit para mbylljes së fushatës dua të falënderoj ekipin e Lëvizjes për Ndryshim për kurajën dhe vendimin e fortë për të bërë betejë kundër një klase politike të kalbur e të korruptuar.

Të shpreh mirënjohjen ndaj vajzave e djemve, burrave e grave profesionistë e të ndershëm , me edukim e formim perëndimor, që kandiduan e besojnë për Ndryshimin.

Dua të falënderoj të gjithë bashkëthemeluesit e saj. Ata janë guximtarët që firmosën për krijimin e Lëvizjes për Ndryshim , si e vetmja shpresë për të nisur Ndryshimin.

Të falënderoj çdo demokrat të vërtetë, çdo qytetar të ndershëm, që edhe pse nën presion, nën kërcënimet e shpifjet e Republikës së re dhe shokëve të tyre, mbështesin Lëvizjen për Ndryshim.

Dua t?i them çdo njërit, se unë e di sa të mërzitur jeni nga politika. Sa të zhgënjyer jeni nga të gjithë kryetarët e Partive.

Ju jeni në fakt të tradhtuar nga secili prej tyre. Jeni të fyer nga arroganca e të treve.

Ata të tre ,në tre dekada kishin çdo gjë në dorë; patën çdo pozicion ekzekutiv. Ata janë përgjegjësit e një Shqipërie të katandisur si vendi më i varfër dhe më i korruptuar në Evropë. Ata janë bashkë. Ata janë tre oligarkët e vërtetë. Ajo çfarë ndodhi ne Elbasan është fytyra dhe identiteti i tyre.

Ata janë në gjendje të bëjnë çdo gjë për pushtetin dhe paratë e tyre.

Ata duhet të largohen.

Ata janë mallkimi i këtij vendi. Është koha për të mbyllur kohën e tyre. Është koha për të zëvendësuar politikën cinike me politikën e ndryshimit dhe të shpresës. Është koha për votën e protestës. Është koha për votën e ndryshimit.

Ndryshimi do të nis nga Lëvizja për Ndryshim. Ne do jemi faktor I rëndësishëm ndryshimi. Votoni Lëvizja për Ndryshim. Votoni Nr.11″, shkruan Topalli/ CNA.al