Fushata zgjedhore/ Bilbil Dervishi: Partitë i janë shmangur platformave të mëdha

23 Prill 2021, 18:49, Politikë CNA

Kandidati i PSD-së për deputet në qarkun e Shkodrës, Bilbil Dervishi, ka folur për mbarëvajtjen e fushatës elektorale të 25 prillit.

Në një prononcim për CNA.al, Dervishi tha se partitë i janë shmangur platformave të mëdha qeverisëse duke qenë se fushata është bërë individualiste.

?Ndryshe nga herët e tjera fushata është personalizuar, pasi ligji përveç votimit për partitë ka edhe votim preferencial për kandidatët. Kjo ka bërë që fushata të zhvillohet kryesisht individuale dhe të mos ketë takime të mëdha elektorale, të formës së tubimeve. Kjo edhe për shkak të gjendjes së pandemisë. Duke qenë se fushata po zhvillohet në këtë formë, indirekt partitë i janë shmangur edhe platformave të mëdha qeverisëse, duke e shndërruar fushatën në një fushatë individualiste të tipit për zgjedhjen e një anëtari të këshillit të bashkisë apo kryesisë së fshatit, duke hyrë në detaje krejt të panevojshme për një deputet të Kuvendit të Shqipërisë, duke e larguar deputetin nga përmbushja e detyrave kushtetuese të tij, e cila do të çojë në uljen e nivelit profesional të deputetëve të ardhshëm e për rrjedhojë edhe cilësi të dobët të ligjeve?, u shpreh ai.

Dervishi tregoi për CNA.al se qytetarët e Shkodrës e kanë pritur shumë mirë, ndërsa bën të ditur se ata i kanë problematikat e tyre.

?Në përgjithësi jemi pritur shumë mirë nga qytetarët, jo vetëm unë si individ por edhe forca politike që unë përfaqësoj, PSD, e cila ka një elektorat të qëndrueshëm në qarkun e Shkodrës, i cili ka mirëpritur listën shumëemërore të kandidatëve në qarkun Shkodër dhe po i mbështet ato gjatë gjithë fushatës. Lista është gjithëpërfshirëse dhe përfaqësuese pasi aty është ruajtur raporti midis bashkive të qarkut, gjinive dhe profesioneve. Kontaktet me zgjedhësit kanë qenë në forma të ndryshme, por më së shumti të drejtpërdrejta me kandidatët. Në këto takime, qytetarët kanë parashtruar problematikat e tyre dhe nga kandidatët u janë rekomanduar zgjidhjet e mundshme të menjëhershme si edhe zgjidhjet alternative të cilat kërkojnë ndryshime ligjore që sigurisht do të propozohen për miratim në Kuvendin e ardhshëm?, vijoi kandidati më tej.

Sipas tij, PSD do të marrë 3 mandate në kryeqendrën e veriut.

?PSD synon që në këto zgjedhje në qarkun e Shkodrës të jetë një nga forcat kryesore politike duke synuar marrjen e 3 mandateve dhe në rang kombëtar deri në 7 mandate me qëllim për të arritur krijimin e një grupi parlamentar dhe pjesmarrjen në qeverinë e ardhshme?, theksoi Dervishi./ CNA.al