Nga Melisa Braci/ Një plumb në këmbë, një plumb në kokë! Si kjo qeveri Shtetit!

8 Dhjetor 2020, 22:13, Opinione CNA

Efektivi i Policisë së Shtetit që plagosi për vdekje sot një shtetas shqiptar justifikohet me pretendimin se nuk e ka parë ku po ia drejtonte armën ngaqë ishte errësirë.

Le ta marrim të mirëqenë këtë. Ama, lindin dy pyetje të tjera, nga vetë deklarata e tij konfuze:

Meqë nuk mund të shihte nga errësira drejt cilës pjesë të trupit po ia drejtonte armën, si arriti të shihte se i riu po nxirrte armën për kërcënim !?

Meqë nuk mund të shihte nga errësira drejt cilës pjesë të trupit po ia drejtonte armën, si arriti që në fillim të dallonte këmbën ( nga ?koka? ) e për së dyti, jo.. !?

Çdokush me pak informacion, e kupton qartë se kjo është tallje me viktimën, me ligjin, me moralin shoqëror dhe turp për organizmin që ai përfaqëson.

Problem i madh është se nuk ekziston vetëm një efektiv me mentalitet e sens logjik të tillë në Shqipëri. Janë shumë.

Janë shumë të tillë që kur veshin uniformën e Policisë së Shtetit mendojnë se kanë në dorë jetën e çdo qytetari të thjeshtë dhe mund të justifikojnë kurdoherë gabimet e shkeljet ligjore të tyre lehtë fare.

Janë shumë të tillë që integrohen në strukturat e Policisë së Shtetit pa njohuritë minimale ligjore, pa plotësuar kriteret e tjera fizike dhe pa asnjë njohuri psikologjike.

Ka po ashtu efektivë që s? kanë integritet profesional as personal. Më e keqja është kur të gjitha këto bashkohen në një, si në rastin e këtij efektivi.

Prandaj, ky është rasti më i mirë për të reflektuar e për të rishikuar dhe një herë krejtësisht sistemin e sigurisë së brendshme, strukturat policore dhe, mbi të gjitha, qëndrimin ndaj kësaj qeverie.

Kjo qeveri ka degraduar me kohë.

Por, në një kohë kur kërcënohet vazhdimisht siguria personale e qytetarëve, nga vetë strukturat shtetërore, do thotë që përtej qeverisë këtu ka degraduar shteti në tërësinë e tij.

Ç? mund të bëjë një qytetar i thjeshtë, kur efektivi i Policisë vret në mes të kryeqytetit, sistemin gjyqësor e ka të shkatërruar, shoqërinë civile e drejtojnë nga ? lart?… !?

Të rrëzojë sa më shpejt atë qeveri që e degradoi në këtë gjendje shtetin shqiptar, së bashku me ?cilindo? që i shtrëngoi dorën atëherë kur po rrëzohej…

Post Scriptum: Ngushëllime familjarëve të viktimës !