Si të shkrepni fotografitë mbresëlënëse për Krishtlindje

20 Dhjetor 2019, 14:17, Blog CNA

Meqenëse festat na zënë zakonisht me njerëzit të dashur, me ambientin të zbukuruar dhe me humor të mirë, ato janë rasti i duhur për të ngrirë momentet më të bukura nëpërmjet fotografisë.

Fotografja ruse, Lena Petrova, ka perfeksionuar mënyrën e saj të fotografimit të kësaj periudhe të veçantë festive të vitit, si për fotografitë spontane ashtu edhe për fotografitë e planifikuara në grup.

Metoda e Lenës për fotografitë familjare mund të përmblidhet me një fjali: ?Do të realizoni fotografi të bukura kur të gjithë harrojnë se po dalin në fotografi dhe thjesht shijojnë kohën që kalojnë me njëri-tjetrin.? Tregoni histori me entusiazëm, qeshni, ngrijani volumin muzikës, shijoni ushqimet e mirëpërgatitura se fotogratitë do të ndjekin procesin tuaj të argëtimit.

Fotografja ruse Lena Petrova ndan me publikun 10 këshilla dhe ide që tregojnë se si të shkrepen fotografitë familjare për Krishtlindje.

1.Zgjidhni momentet që kanë rëndësi
“Për fotografitë tuaja spontane, kini parasysh se cilat elemente të pushimeve janë të rëndësishme për ju dhe për familjen tuaj. Përveç dekorimit të pemës së Krishtlindjes dhe hapjes së dhuratave, ka udhëtime në dyqane për Krishtlindje, përgatitje për darkën, nënshkrimi i kartolinave, emocioni i pritjes së Babagjyshit dhe pa dyshim shumë gjëra të tjera që kanë domethënie për ju dhe të dashurit tuaj. Prandaj sigurohuni që ta keni gjithmonë kamerën gati…”

2. Përqendrohuni te gjërat që kanë rëndësi
“Gjërat që krijojnë një atmosferë të rehatshme në jetën reale nuk janë gjithmonë të përshtatshme për një fotografi të pastër, prandaj kur realizoj portrete të njerëzve në shtëpitë e tyre, shpesh lëviz mobiliet dhe dekoret e tepërta për t’i larguar nga kuadri, duke përfshirë edhe fotografitë në mure. Nuk e bëj këtë për fotografitë spontane, por fatmirësisht ka shumë mënyra të tjera për ta rregulluar sfondin duke përdorur vetëm kamerën.

3. Mendohuni për sfondin
“Për një portret familjar, kërkohet një sfond që është i qetë, në mënyrë që të mos tërheqë shumë vëmendje sfondi, por njerëzit në fotografi. Por nuk ka pse të jetë i thjeshtë, mund të përfshini një pemë Krishtlindjesh ose drita dekoruese për të krijuar një atmosferë festive.”

4. Përdorni objekte plotësuese dhe dekorime
“Për një fotografi Krishtlindjeje në ambiente të jashtme, do t’ju duhen elemente në kuadër që tregojnë se është koha e Krishtlindjes, si p.sh. pemë, drita dhe dekore. Mund të sillni po ashtu objektet tuaja plotësuese, si p.sh. papuçe, lodra ose ëmbëlsira. Mos kini frikë se e teproni; është më mirë të keni pak nga të gjitha se të kufizoheni në një ose dy lloje objektesh. Mendoni edhe për veshjet festive po ashtu. Mund të duket e çuditshme që subjektet tuaja të pozojnë me xhaketa të zakonshme kur mbajnë me objekte të Krishtlindjes në duar ose janë të rrethuar nga drita festive. Por sigurohuni që veshjet të mos tërheqin vëmendjen nga fytyrat në fotografi, me ngjyra shumë të forta ose në kontrast të fortë.”

5. Përdorni lenten e duhur
“Qëndroni në një distancë nga subjektet tuaja që ju lejon të përdorni një lente 50mm. Mund të jetë tundimi për të përdorur një lente me kënd të gjerë për të përfshirë më shumë persona në kuadër kur nuk keni hapësirë, por gjatësitë e shkurtra fokale do të krijojnë shformime që nuk do t’u pëlqejnë familjarëve tuaj. Nëse nuk keni një lente të posaçme për portretet, qëndroni sa më larg të jetë e mundur nga subjekti dhe zmadhoni me një lente të paketës standarde.”

6. Bëjeni argëtuese për fëmijët
“Për të nxjerrë fotografi të mira të fëmijëve duke luajtur, gjëja më e mirë është të luani me ta, t’i nxitni pak dhe të stimuloni imagjinatën dhe besimin e tyre. Përpiquni të zbuloni se çfarë dëshirojnë të bëjnë fëmijët dhe krijoni një situatë ku mund ta tregojnë këtë. Fotografitë më të mira do t’i realizoni kur të gjithë argëtohen.”

7. Lëreni muzikën të vazhdojë
“Përpiquni të shmangni heshtjen gjatë përgatitjeve tuaja për fotografi në grup. Shpesh, fotografët fillestarë kanë tendencën të përqendrohen te problemet teknike, duke u mbyllur në vetvete dhe duke harruar njerëzit që pozojnë për fotografinë. Nga ana tjetër, shokët tuaj dhe anëtarët e familjes do të mërziten dhe kjo duket në fotografi. Tregojuni se çfarë po bëni dhe filloni muzikën për të bërë që njerëzit të qetësohen. Zakonisht unë sjell një altoparlant portativ për këtë arsye.”

8. Përsosni kompozimin e fotografive në grup
“Kryesore është organizmi i grupit për një portret familjar. Objektivi juaj është t’i vendosni kokat e të gjithëve në nivele të ndryshme. Shikoni nëse mund të gjeni karrige me lartësi të ndryshme, ose përdorni një kolltuk dhe bëni që një person të ulet te krahu i kolltukut. Zakonisht unë filloj me qendrën e kuadrit dhe vazhdoj me pjesën e jashtme, duke i shtuar njerëzit një nga një. Por nëse familja është e madhe, shikoj në kuadër, përcaktoj madhësinë e kuadrit dhe vendos dy persona në kufijtë majtas dhe djathtas të kuadrit. Më pas të gjithë të tjerët kërkoj që të zënë vend në hapësirën mes tyre dhe bëj disa rregullime për të siguruar kompozimin më të mirë.

Duke caktuar kohëmatësin në kamerë, ose duke përdorur aplikacionin Canon Camera Connect për ta nxjerrë fotografinë në largësi, mund të përfshini edhe veten tuaj në portretin familjar. Mos harroni të nxirrni shumë fotografi, në rast se dikush mbyll sytë.”

9. Përdorni thellësinë e duhur të fushës
“Për një portret në grup, pothuajse gjithmonë punoni me dy rreshta njerëzish. Për të siguruar një fokus të qartë për të gjithë pjesëmarrësit në dy rreshta, hapja e diafragmës duhet të jetë rreth f/4-5.6.”

10. Mos harroni kafshët shtëpiake
“Llambat dhe lodrat e Krishtlindjes janë të reja dhe emocionuese për kafshët shtëpiake, kështu që ka shumë mundësi të realizoni fotografi argëtuese dhe gazmore për Krishtlindje me to. Mund ta ngacmoni një mace me shirita dhuratash ose dritat festive, dhe qentë luajnë me gëzim jashtë në borë me fëmijët – të gjitha këto janë subjekte të shkëlqyera për fotografi argëtuese për Krishtlindje.”/CNA.al